Суд ҳужжатларида келтирилишича, 30 ёшли Д.Ю. Урганч шаҳар ИИБ Жамоат хавфсизлиги хизмати Ҳуқуқбузарликлар профилактикаси бўлими профилактика кичик инспектори вазифасида ишлаб келган.
Ҳодиса 2025 йил 23 декабрь куни содир бўлган. Д.Ю. дўстининг тўй муносабати билан ташкил этилган зиёфатда спиртли ичимлик истеъмол қилган. Кейин у Cobalt автомашинасида икки нафар танишини уйига олиб кетиш учун йўлга чиққан.
Гувоҳларнинг суддаги кўрсатмасига кўра, ҳайдовчи маст ҳолда юқори тезликда ҳаракатланган. Йўловчилар ундан тезликни пасайтиришни сўраганига қарамай, у ҳаракатни давом эттирган. Автомобиль йўлдаги чуқурликдан сўнг бошқарувни йўқотиб, бетон тўсиққа урилиб ағдарилган.
Оқибатда орқа ўриндиқда кетаётган йўловчи оғир тан жароҳати олиб, шифохонада вафот этган.
Марҳумнинг отаси судда судланувчи ва унинг яқинлари кечирим сўраб келгани ҳамда моддий ёрдам таклиф қилганини, аммо уларни қабул қилмаганини билдириб, айбдорга нисбатан қонуний чора кўришни сўраган.
Жиноят ишлари бўйича Шовот туман суди ҳукмига кўра, Д.Ю. 4 йил муддатга озодликдан маҳрум қилинган. Шунингдек, у 3 йил давомида транспорт воситаларини бошқариш ҳуқуқидан маҳрум этилган.
