20 август куни «Навоийуран» давлат корхонаси ҳамда вилоят Оила ва хотин-қизлар бошқармаси ҳамкорлигида хотин-қизлар билан ишлаш самарадорлигини оширишга бағишланган семинар бўлиб ўтди.
Унда корхонанинг фаол хотин-қизлари, ташкилот ва муассасаларда хотин-қизлар масалалари бўйича масъул ходимлар, ҳамкор ташкилотлар ҳамда оммавий ахборот воситалари вакиллари иштирок этди.
Семинарда корхонада хотин-қизлар билан ишлашда ҳар бир ходимнинг мурожаати ва эҳтиёжини ўз вақтида ўрганиш, муаммолар сабабларини таҳлил қилиш ҳамда уларни бартараф этиш бўйича аниқ чораларни белгилаш муҳимлиги таъкидланди.
Навоий вилояти ҳокими ўринбосари — оила ва хотин-қизлар бошқармаси бошлиғи Малика Мамадиярова хотин-қизларни қўллаб-қувватлаш, уларнинг жамият ва меҳнат жамоаларидаги фаоллигини ошириш, ҳуқуқ ва қонуний манфаатларини ҳимоя қилиш борасида амалга оширилаётган ишлар ҳақида фикр билдирди.
Таъкидланганидек, хотин-қизлар билан ишлашни фақат алоҳида тадбирлар билан чекламасдан, тизимли ва манзилли ёндашув асосида ташкил этиш муҳим. Бунда уларнинг ижтимоий-иқтисодий фаоллигини ошириш, касбий салоҳияти ва ташаббусларини қўллаб-қувватлаш, муносиб меҳнат шароитларини яратиш ҳамда оила ва иш ўртасидаги уйғунликни таъминлашга эътибор қаратиш зарур.
Семинарда «Навоийуран» давлат корхонасида хотин-қизлар билан ишлаш тажрибаси ҳам тақдим этилди. Корхона бошқармаси ҳужжатлар ижросини назорат қилиш ва мувофиқлаштириш хизмати бошлиғи Наргиза Кенжаева фаол ва ташаббускор хотин-қизларни қўллаб-қувватлаш, уларнинг касбий ва ижтимоий фаоллигини ошириш бўйича амалга оширилаётган ишлар ҳақида маълумот берди.
Шунингдек, семинарда хотин-қизларнинг меҳнат ҳуқуқларини таъминлаш, оилавий муносабатларда ижтимоий-маънавий муҳитни мустаҳкамлаш, тазйиқ ва зўравонликнинг олдини олиш, бандлик ва касбий ривожланишни қўллаб-қувватлаш ҳамда гендер тенглик тамойилларини меҳнат жамоаларида қарор топтириш масалалари муҳокама қилинди.
Муҳокамалар давомида назарий маълумотлар билан бирга амалиётда учрайдиган ҳолатлар ва уларнинг ечимлари юзасидан фикр алмашилди. Иштирокчилар хотин-қизлар масалалари бўйича масъул ходимлар фаолиятини такомиллаштириш, тажриба алмашиш ва ҳамкорликни кучайтириш бўйича таклифлар билдирди.
Семинар якунида хотин-қизларни қўллаб-қувватлаш, уларнинг ҳуқуқ ва манфаатларини таъминлаш ҳамда жамиятдаги фаоллигини оширишга қаратилган ишларни изчил давом эттириш муҳимлиги таъкидланди.
Тадбирнинг маданий қисмида концерт дастури намойиш этилди.
Навоийуран» ДК ПР хизмати
Ҳамкорлик материали
