Ҳар бир мамлакатнинг рейтингдаги ўрни тўртта асосий тоифага бирлаштирилган. Бу 24 та кўрсаткични ҳисобга олган ҳолда комплекс баҳолаш орқали аниқланади: молия ва солиққа тортиш, ҳаёт сифати ва саломатлик, хавфсизлик ва барқарорлик, шунингдек, кўчиб ўтиш ва ўзини намоён қилиш имкониятлари. Натижалар бир нечта кутилмаган сюрпризларни тақдим этади: дунёнинг энг бой давлатларидан баъзилари биринчи ўнталикдан анча ташқарида.
Биринчи ўринни 72,8 балл билан Эстония эгаллаган. Сингапур (72,6) ва Малайзия (72,0) ундан бироз ортда қолмоқда. Эстониянинг етакчилиги, айниқса, мамлакат аҳолиси атиги 1,3 миллионга яқин эканлигини ҳисобга олсак, эътиборга лойиқ. У, айниқса, самарали ҳуқуқий тизим, ривожланган стартап экотизими ва ёшлар ўртасида ишсизлик даражасининг пастлиги туфайли хавфсизлик ва яшаш шароитлари бўйича юқори натижаларни кўрсатмоқда. Болтиқбўйининг бошқа давлатлари ҳам энг яхши 20 таликка кирди: Литва 71,0 балл билан 10-ўринни, Латвия эса 68,7 балл билан 18-ўринни эгаллади. Жаҳон рейтингида биринчи йигирматаликка кирган давлатларнинг тенг ярми Европадан ўрин олган. Улар орасида Португалия (71,6), Чехия (69,9) ва Малта (69,8) бор.
Европа мамлакатлари тиббий ёрдамнинг юқори сифати ва умуман ҳаёт сифатининг яхши кўрсаткичлари туфайли устунликка эга. Шу билан бирга, Жанубий ва Шарқий Европа мамлакатларида яшашнинг нисбатан қулайлиги Болгария ва Кипрга ҳар бири 69,7 балл билан Шимолий ва Ғарбий Европадаги баъзи таниқли рақобатчилардан ўзиб кетиш имконини беради.
Шарқий ва Жануби-Шарқий Осиё давлатлари ҳам яхши ўринларни эгаллаб турибди. Тайван (71,4) дунёда бешинчи ўринни эгаллади, Бруней (69,3) ва Япония (69,1) ҳам кучли йигирматаликка кирди.
Жаҳон рейтингида охирги 20 та ўриндан 13 таси Африка давлатларига тўғри келади, деб хабар берди naked-science.ru.
Африка давлатлари орасида энг ёмон натижани Жанубий Судан (42,3) кўрсатди. Бироқ жаҳон рейтингида сўнгги икки ўрин Афғонистон (39,5) ва Яманга (41,4) насиб этди.
Рўйхатнинг қуйи қисмида жойлашган кўплаб мамлакатлар авторитар бошқарув, сиёсий беқарорлик ёки заиф давлат институтларига дуч келмоқда. Масалан, Афғонистон ва КХДР (44,4) бир вақтнинг ўзида бир нечта мезонлар бўйича паст кўрсаткичларни намойиш этмоқда, Гаити (47,3) эса давлат ҳокимиятининг жиддий инқирози оқибатларини бошдан кечиришда давом этмоқда.
Мулк ҳуқуқларининг заиф ҳимояси, шунингдек, хавфсизлик, соғлиқни сақлаш ва барқарорликнинг паст кўрсаткичлари рейтингнинг энг қуйи поғонасида жойлашган мамлакатларнинг позициясига сезиларли таъсир кўрсатади.
Россия 58,9 балл тўплаб, 184 давлат орасида 121-ўринни эгаллади ва рейтингнинг қуйи ярмида қолган.
