Шунингдек, Ўзбекистон илк бор электрон ҳукумат ривожланиш даражаси энг юқори бўлган давлатлар қаторига — «Very High EGDI» гуруҳига кирди.
Бу ҳақда Рақамли технологиялар вазирлиги ахборот хизмати БМТ маълумотларига таяниб хабар берди.
Мазкур натижа мамлакатда рақамли иқтисодиётни ривожлантириш, давлат бошқарувига замонавий ахборот технологияларини жорий этиш ва аҳолига кўрсатилаётган давлат хизматлари сифатини ошириш борасида амалга оширилаётган ислоҳотлар самарасини кўрсатади.
«Ўзбекистон — 2030» стратегиясида мамлакатни БМТнинг Электрон ҳукуматни ривожлантириш индекси бўйича дунёнинг энг илғор 30 та давлати қаторига олиб чиқиш устувор вазифалардан бири сифатида белгиланган.
Тадқиқот натижаларига кўра, Ўзбекистоннинг умумий Электрон ҳукуматни ривожлантириш индекси 0,8930 баллни ташкил этди. 2024 йилда бу кўрсаткич 0,7999 баллга тенг бўлган.
Индекснинг таркибий йўналишлари бўйича мамлакатнинг натижалари қуйидагича баҳоланди:
Онлайн давлат хизматлари (OSI) — 0,8885 балл;
Телекоммуникация инфратузилмаси (TII) — 0,9213 балл;
Инсон капитали (HCI) — 0,8692 балл.
Шунингдек, фуқароларнинг давлат бошқарувидаги иштироки (E-Participation Index) кўрсаткичи 0,8276 баллни ташкил этди.
Ҳисоботда Ўзбекистоннинг рақамли трансформация борасидаги тажрибаси, жумладан, сунъий интеллект ва рақамли иқтисодиётни ривожлантиришга қаратилган ташаббуслари ҳам ижобий мисол сифатида қайд этилган. Хусусан, сунъий интеллект технологияларини давлат ва хусусий секторда жорий этиш, илмий ҳамкорликни кенгайтириш ҳамда соҳадаги пилот лойиҳаларга эътибор қаратилган.
Қайд этиш жоизки, БМТнинг Электрон ҳукуматни ривожлантириш индекси давлатларнинг онлайн хизматлар ривожи, телекоммуникация инфратузилмаси ва инсон капитали ҳолатини баҳолайди.
Ўзбекистоннинг 32-ўринга кўтарилиши мамлакатнинг стратегик мақсади — БМТ рейтингидаги энг илғор 30 та давлат қаторига кириш йўлидаги муҳим натижалардан бири ҳисобланади.