Жорий йилда танлов иштирокчилари Ўзбекистоннинг турли ҳудудларидаги тоғлар, кўл ва дарёлар, ўрмонлар, ноёб ҳайвонот дунёси ҳамда муҳофаза этиладиган табиий ҳудудларни тасвирга олди. Танловга жами 1 172 та фотосурат юкланган. Бу кўрсаткич билан Ўзбекистон Wiki Loves Earth 2026да иштирок этган мамлакатлар орасида 20-ўринни эгаллади.
Сараланган фотосуратларда Тошкент ботаника боғи, Зомин миллий табиат боғи, Угам-Чотқол ҳудуди, Урунгоч табиий ёдгорлиги, Қорақалпоғистондаги Судочье табиий қўриқхонаси каби табиат масканлари акс этган.
Wiki Loves Earth нафақат фототанлов, балки мамлакатларнинг табиий мероси ҳақида очиқ визуал архив яратишга қаратилган халқаро лойиҳа ҳисобланади. Танлов доирасида олинган фотосуратлар Wikimedia Commons платформасига жойлаштирилиб, кейинчалик энциклопедик, таълимий ва маърифий лойиҳаларда фойдаланилиши мумкин.
Эндиликда Ўзбекистоннинг сараланган 12 та фотосурати халқаро босқичда бошқа мамлакатлардан танланган ишлар билан бирга баҳоланади.
