Унда Ўзбекистон Республикаси Мудофаа саноати агентлиги тизимидаги корхоналар ҳам иштирок этмоқда. Улар ўз маҳсулотларини «Made in Uzbekistan» ягона миллий бренди остида намойиш қилмоқда.
Ўзбекистон мазкур халқаро кўргазмада Марказий Осиё минтақасидан ягона иштирокчи давлат сифатида қатнашмоқда.
Мудофаа саноати агентлиги кўргазма доирасида сўнгги йилларда ишлаб чиқилган инновацион маҳсулотлар ва турли йўналишлардаги ишланмаларни тақдим этмоқда.
Ўзбекистон миллий стендидан мамлакатда ишлаб чиқарилган мудофаа маҳсулотлари, жумладан, ўқ-дорилар, шахсий ҳимоя воситалари, ҳарбий анжомлар, авиация компонентлари, дронлар ҳамда уларга қарши курашиш тизимлари ўрин олган.
Маҳаллий маҳсулотлар халқаро мутахассислар ва хорижий делегациялар, хусусан, Африка қитъаси давлатлари вакилларида қизиқиш уйғотмоқда.
Кўргазмада «Made in Uzbekistan» бренди остидаги ҳарбий ва икки хил мақсадда фойдаланиладиган маҳсулотларни намойиш этиш маҳаллий мудофаа саноати корхоналарининг экспорт салоҳиятини кенгайтириш, халқаро ҳамкорлик алоқаларини мустаҳкамлаш ва янги ҳамкорлик йўналишларини ривожлантиришга қаратилган.
Маълумот учун, икки йилда бир марта ўтказиладиган AAD 2026 кўргазмасида дунёнинг 30 дан ортиқ давлатидан келган 350 дан зиёд етакчи компания иштирок этмоқда. Тадбир доирасида бизнес-форумлар ва авиашоудаги кўргазмали чиқишлар ҳам ташкил этилган.
Ўзбекистон делегацияси миллий маҳсулотларни кўргазма якунланадиган 20 сентябрга қадар намойиш этади.
