Учрашувнинг дастлабки дақиқалариданоқ Ўзбекистон терма жамоаси ташаббусни ўз қўлига олди. Бироқ ҳисоб фақат 29-дақиқада очилди. Дарвоза олдидаги вазиятдан унумли фойдаланган Улуғбек Маратов жамоасини олдинга олиб чиқди.
Орадан беш дақиқа ўтиб, Қувончбек Абраев жарима зарбасини маҳорат билан ижро этиб, ҳисобдаги фарқни оширди. Биринчи бўлим 2:0 ҳисоби билан якунланди.
Танаффусдан кейин ҳам ўзбек футболчилари рақибга босимни кучайтиришда давом этди. 67-дақиқада Шораҳим Шораҳмедовнинг аниқ зарбаси Ҳиндистон дарвозабонини яна бир бор мағлуб этди.
Учрашувнинг асосий вақтига яқин Нурбек Серсенбаев ҳам ўз номини тўпурарлар рўйхатига ёздирди ва баҳсдаги сўнгги нуқтани қўйди — 4:0.
Шу тариқа, Ўзбекистон U20 терма жамоаси икки учрашувдан сўнг 6 очко билан B гуруҳида биринчи ўринни эгаллаб турибди. Гуруҳдаги ҳал қилувчи баҳсда Ўзбекистон якшанба куни Сурияга қарши майдонга тушади.
