Бундай келишув Бирлашган Миллатлар Ташкилотининг Иқлим ўзгариши бўйича 31-конференцияси (UNFCCC COP31) доирасида Туркиянинг Анталия шаҳрида ўтказилган учрашувда эришилди.
Унда Ўзбекистон Президентининг экология масалалари бўйича маслаҳатчиси — Экология ва иқлим ўзгариши миллий қўмитаси раиси Азиз Абдуҳакимов ҳамда Туркиянинг атроф-муҳит, урбанизация ва иқлим ўзгариши вазири Мурат Курум иштирок этди.
Музокаралар якунида Ўзбекистон Республикаси Экология ва иқлим ўзгариши миллий қўмитаси ҳамда Туркиянинг Атроф-муҳит, урбанизация ва иқлим ўзгариши вазирлиги ўртасида атроф-муҳитни муҳофаза қилиш соҳасида ўзаро англашув меморандуми имзоланди.
Ҳужжатга кўра, томонлар атмосфера ҳавоси ва сув ресурслари ифлосланишининг олдини олиш, табиий ресурслар ва муҳофаза этиладиган ҳудудларни асраш, чўлланиш ҳамда ер деградациясига қарши курашиш бўйича ҳамкорлик қилади.
Шунингдек, чиқиндиларни бошқариш, айланма иқтисодиёт ва экологик маданиятни ривожлантириш, иқлим ўзгариши оқибатларини юмшатиш ҳамда унга мослашиш йўналишларида тажриба алмашиш ва қўшма лойиҳаларни амалга ошириш режалаштирилган.
Учрашувда миллий иқлим мажбуриятларини инвесторлар учун жозибадор лойиҳаларга айлантиришга қаратилган BRIDGE ташаббуси ҳам муҳокама қилинди.
Бундан ташқари, Туркиянинг 2027 йил 15–17 июнь кунлари Тошкентда ўтказиладиган «Eco Expo Central Asia 2027» халқаро кўргазмасида иштирок этиш истиқболлари кўриб чиқилди.
Меморандум экологик муаммоларни ҳал этиш бўйича икки мамлакат ўртасида тажриба алмашиш ва қўшма ташаббусларни амалга ошириш учун асос бўлиб хизмат қилади.
