Душанба куни республика ҳудудларининг айрим жойларида ёмғир ёғади, баъзи жойларда кучли бўлиши мумкин. Момақалдироқ кузатилиши эҳтимоли бор. Фақат Фарғона водийсида ёғингарчилик кутилмайди. Шамол тезлиги 13–18 м/с гача кучайиб, айрим жойларда чанг-тўзонлар билан кузатилади. Ҳарорат 15–20 даража, шимолда 8–13 даража илиқ бўлади.

10 ноябрь куни совуқ ва нам ҳаво массаларининг кириб келиши янада сезиларли бўлади. Республика бўйича ёмғир ёғади, баъзи жойларда кучли бўлиши, момақалдироқ кузатилиши мумкин. Қорақалпоғистон Республикасида ёмғир қорга айланиши эҳтимоли бор.

Шамол тезлиги айрим жойларда 13–18 м/с гача кучаяди. Ҳарорат кечаси 7–12 даража, кундузи 10–15 даража илиқ, шимолда эса кечаси 0–5 даража, кундузи 5–10 даража илиқ бўлади.

11 ноябрь, чоршанба куни Ўзбекистоннинг катта қисмида ёмғир ёғади, баъзи жойларда кучли бўлиши мумкин. Қорақалпоғистон Республикаси, Хоразм, Бухоро ва Навоий вилоятларида ёғингарчилик кутилмайди.

Ҳарорат кечаси 3–8 даража, кундузи 7–12 даража илиқ бўлади. Шимолда кечаси 2–7 даража совуқ, кундузи 3–8 даража илиқ кузатилади.

12 ноябрь куни республика бўйича ёғингарчилик кутилмайди. Ҳарорат кечаси 0–5 даража илиқ, айрим жойларда 2 даражагача совуқ, кундузи 7–12 даража илиқ бўлади. Шимолда кечаси 2–7 даража совуқ, кундузи 3–8 даража илиқ кузатилади.

13 ноябрь куни айрим ҳудудларда ёмғир ёғиши мумкин. Қорақалпоғистон Республикаси, Хоразм, Бухоро ва Навоий вилоятларида ёғингарчилик кутилмайди.

Ҳарорат кечаси 0–5 даража илиқ, айрим жойларда 2 даражагача совуқ, кундузи 7–12 даража илиқ бўлади. Шимолда кечаси 2–7 даража совуқ, кундузи 5–10 даража илиқ кузатилади.

Тошкент шаҳрида об-ҳаво қандай бўлади?

  • 9 ноябрь: вақти-вақти билан ёмғир ёғади, момақалдироқ бўлиши мумкин. Шамол ғарбдан 3–8 м/с тезликда эсади, 11–13 м/с гача кучайиши мумкин. Ҳарорат 18–20 даража илиқ.
  • 10 ноябрь: булутли об-ҳаво кузатилади, ёмғир ёғади, момақалдироқ бўлиши мумкин. Ҳарорат кечаси ва кундузи 12–14 даража илиқ.
  • 11 ноябрь: вақти-вақти билан ёмғир ёғади. Ҳарорат кечаси 5–7 даража, кундузи 8–10 даража илиқ.
  • 12 ноябрь: ёғингарчилик кутилмайди. Шамол шимоли-шарқдан 3–8 м/с тезликда эсади. Ҳарорат кечаси 1–3 даража, кундузи 10–12 даража илиқ.

Шундай қилиб, дам олиш кунларидаги ғайриоддий илиқ об-ҳаво ўрнини ёғингарчилик ва анча салқин кунлар эгаллайди. Айниқса, шимолий ҳудудларда ҳароратнинг нолдан пастга тушиши кутилмоқда.