Форум Ўзбекистондаги Ислом цивилизацияси маркази, Дин ишлари бўйича қўмита, Имом Бухорий, Имом Мотуридий ва Имом Термизий халқаро илмий-тадқиқот марказлари, Ўзбекистон мусулмонлари идораси, Ўзбекистон халқаро исломшунослик академияси ҳамда Таълим, фан ва маданият масалалари бўйича Ислом ташкилоти (ICESCO) ҳамкорлигида ташкил этилмоқда.
Анжуманда 50 дан ортиқ мамлакатдан қарийб 300 нафар хорижий меҳмон — давлат ва жамоат арбоблари, вазирлар, муфтийлар, академиклар, исломшунос олимлар, музей ва кутубхоналар раҳбарлари, халқаро ташкилотлар ҳамда оммавий ахборот воситалари вакиллари иштирок этиши кутилмоқда.
Форум давомида ислом цивилизациясининг жаҳон илм-фани, таълим, маданият ва маънавий мерос ривожига қўшган ҳиссаси, цивилизациялараро мулоқот, диний бағрикенглик, маданий дипломатия, қўлёзмаларни асраш ва рақамлаштириш каби мавзулар муҳокама қилинади.
Дастурдан 4 та халқаро конференция, 10 та ялпи мажлис, 15 та пленар йиғилиш ва 6 та соҳавий шўъба йиғилиши ўрин олган. Шунингдек, китоблар тақдимоти, қўлёзмалар ва ислом санъати кўргазмалари, халқаро учрашувлар ҳамда ҳамкорлик меморандумларини имзолаш маросимлари ўтказилиши режалаштирилган.
Самарқандда Имом Бухорийнинг «Ал-Жомеъ ас-Саҳиҳ» асарига бағишланган халқаро конференция, Термизда эса Имом Термизийнинг илмий меросига бағишланган анжуман бўлиб ўтади. Шунингдек, Имом Мотуридий таълимотига бағишланган илмий муҳокамалар ҳам ташкил этилади.
Форум доирасида иштирокчилар Ўзбекистондаги Ислом цивилизацияси маркази, Имом Бухорий ёдгорлик мажмуаси ва бошқа тарихий-маърифий объектларга ташриф буюради.
Ташкилотчиларнинг таъкидлашича, мазкур форум Ўзбекистоннинг ислом цивилизацияси илмий-маърифий меросини халқаро миқёсда тарғиб қилиш, илмий ҳамкорликни кенгайтириш ва маданиятлараро мулоқотни мустаҳкамлашга хизмат қилади.
