Бу Президентнинг 2026 йил 6 ноябрдаги ПФ–241-сонли фармонида белгиланган.
Фармонга мувофиқ, Ягона криминоген маълумотлар платформаси ишлаб чиқилади. Унда жиноятларнинг объектив ва субъектив сабаблари, уларни бартараф этишга масъул идоралар ва мансабдор шахслар, шунингдек, амалга оширилган чора-тадбирлар натижалари электрон реестрда юритилади.
Платформа орқали масъул идоралар томонидан кўрилган чоралар самарадорлиги инсон омилисиз ойлик, ярим йиллик ва йиллик кесимда назорат қилинади.
Шунингдек, ҳудудлар, маҳаллалар ва жиноят турлари бўйича жиноятчилик динамикаси таҳлил қилиниб, унинг ярим йиллик ва йиллик прогнозлари шакллантирилади. Натижалар асосида криминоген вазияти оғир ҳудудларга вазиятни барқарорлаштириш бўйича чораларни белгилаш юзасидан хабарномалар юборилади.
Платформани жорий этиш босқичлари:
2027 йил якунига қадар Тошкент шаҳрининг Олмазор туманида синов тариқасида ишга туширилади;
2028 йилдан бошлаб республика ҳудудларида босқичма-босқич жорий этилади.
Бундан ташқари, ҳар йили аҳоли ўртасида миллий виктимологик сўров ўтказилади. У орқали фуқароларнинг жиноятчиликдан жабрланиш ҳолатлари ўрганилади.
Аҳолининг ўз хавфсизлигига бўлган ишончи ва ҳуқуқни муҳофаза қилувчи органлар фаолиятига муносабати бўйича ижтимоий сўровлар ҳам ташкил этилади.
Ёшлар, вояга етмаганлар, аёллар, муқаддам судланган ва пробация ҳисобидаги шахслар, шунингдек, «қизил» тоифадаги маҳаллалар бўйича манзилли криминологик тадқиқотлар ўтказилиши ҳам белгиланган.
