Toshkent shahar IIBB maʼlum qilishicha, 11 iyun kuni soat 21:34 atrofida 1982 yilda tugʻilgan R.Yu. boshqaruvidagi Cobalt avtomashinasi Yakkasaroy tumanidagi Shota Rustaveli koʻchasida yoʻl harakati qoidalarini buzgan holda harakatlangan. Qayd etilishicha, mazkur shaxs ruhiy-asab kasalliklari shifoxonasida roʻyxatda turadi.

Hududda xizmat olib borayotgan ichki ishlar organlari xodimlarining toʻxtash haqidagi qonuniy talablariga boʻysunmagan haydovchi harakatni davom ettirib, bir nechta transport vositasiga texnik shikast yetkazgan.

Tezkor chora-tadbirlar natijasida boshqa fuqarolarga zarar yetkazilishining oldini olish maqsadida IIO xodimlari tabel qurolidan foydalangan. Ogohlantirishdan soʻng avtomashina gʻildiragiga oʻq uzilib, transport vositasi toʻxtatilgan va haydovchining keyingi noqonuniy harakatlariga chek qoʻyilgan.

Hozirda holat yuzasidan Toshkent shahar IIBB tomonidan tergovga qadar tekshiruv oʻtkazilmoqda. Tekshiruv natijalari boʻyicha qoʻshimcha maʼlumot berilishi maʼlum qilindi. Mazkur holat Toshkent shahar IIBB rahbariyati nazoratiga olingan.