Pekin shahrida O‘zbekiston Bosh vaziri Abdulla Aripov hamda Xitoy Davlat kengashi vitse-premyeri, Xitoy Kommunistik partiyasi Markaziy qo‘mitasi Siyosiy byurosi a’zosi Lyu Gochjun o‘rtasida uchrashuv bo‘lib o‘tdi. Tomonlar Xitoy—O‘zbekiston hukumatlararo hamkorlik qo‘mitasining 8-yig‘ilishida ham ishtirok etdi.

Muzokaralar chog‘ida O‘zbekiston va Xitoy o‘rtasidagi munosabatlar keyingi yillarda izchil rivojlanayotgani, yuqori darajadagi muloqotlar esa amaliy hamkorlikni kengaytirishga xizmat qilayotgani qayd etildi.

Abdulla Aripov O‘zbekiston Xitoyni uzoq muddatli va ishonchli strategik sherik sifatida baholashini ta’kidladi. Uning so‘zlariga ko‘ra, Toshkent ikki davlat rahbarlari belgilab bergан ustuvor yo‘nalishlar asosida siyosiy ishonchni mustahkamlash va amaliy hamkorlikni yanada kengaytirish taraftdori.

Uchrashuvda savdo-iqtisodiy aloqalar, investitsiyalar, energetika, transport, qishloq xo‘jaligi, ilm-fan va madaniy-gumanitar sohalardagi hamkorlikni rivojlantirish masalalari muhokama qilindi. Shuningdek, “Bir makon, bir yo‘l” tashabbusi doirasidagi qo‘shma loyihalarni faollashtirish muhimligi ta’kidlandi.

Bosh vazir O‘zbekistonning “yagona Xitoy” tamoyiliga qat’iy sodiqligini yana bir bor tasdiqladi. Shu bilan birga, u Xitoy raisi Si Tszin’pin tomonidan ilgari surilgan global tashabbuslarni amalga oshirishda hamkorlik qilishga tayyor ekanini bildirdi.

Tomonlar ikki davlat xalqlari manfaatlariga xizmat qiladigan hamkorlikni yanada chuqurlashtirish va ko‘p tomonlama muvofiqlashuvni kuchaytirish muhimligini qayd etdi.