Жоқары мәртебели мийманлар Орайлық Азиядағы ислам архитектурасының ең уллы естеликлеринен бири ҳәм Қазақстанның бас руўхый белгиси – Хожа Ахмед Яссаўий мақбарасын зыярат етти.
XIV әсирдиң ақырында Әмир Темурдың буйрығы менен қурылған мақбара бүгинги күнде ЮНЕСКОның Пүткил дүнья жүзилик мийрасы дизимине киргизилген, Орта Азиядағы орта әсир ислам архитектурасының ең белгили естеликлеринен бири болып есапланады. Оның қурылысы 1389-1391-жыллары басланып, XIV әсир ақырына шекем даўам еткен. Комплексти жаратыўда Орта Азия өнерментлери менен бирге басқа аймақлардан келген архитектор ҳәм безеўшилер де қатнасты.
Жетекшилер уллы шайыр ҳәм ойшылдың естелигине ҳүрмет көрсетти.
Делегациялардың басшылары "Ҳәзирет Султан" музей-қорықханасының зыярат орайы менен де танысты. Бул жерде мийманларды қабыл етиў, көргизбелер өткериў, Түркстанның бай тарийхый-мәдений мийрасын көрсетиў ушын заманагөй шараятлар жаратылған.
Орайда орта әсирлердиң бийбаҳа мийрасын қәстерлеп сақлаў, үйрениў ҳәм үгит-нәсиятлаўға қаратылған турақлы музей экспозициясы сыпатында ашылған "Сийрек ушырасатуғын экспонатлар залы" айрықша орын ийелейди.
Экспозицияда Хожа Ахмед Яссаўий мавзолейи менен байланыслы сийрек ушырасатуғын тарийхый естеликлер, соның ишинде, XIV–XV әсирлерге тийисли тийкарғы буйымлар, орта әсир декоратив көркем өнери, керамика ҳәм архитектуралық безеў үлгилери көрсетилген. Олардың арасында қәбирстанның ҳақыйқый есиги, Хожа Ахмед Яссаўийге жабылған жабыў, Әмир Темур саўға еткен бронза шамшырақлар, Түркстанның әййемги тарийхынан дәрек беретуғын археологиялық ҳәм керамикалық табылмалар бар.
Бундай естеликлер ҳәм мәдений жойбарлар руўхый мийрасты қәстерлеп сақлаў, тарийхый естеликти беккемлеў, улыўма тамыр, дин ҳәм дәстүрлер менен байланысқан туўысқан халықларды және де жақынластырыўда үлкен әҳмийетке ийе екени атап өтилди.
