Бұл мақсаттар Өзбекстан Республикасы Президентінің 2026 жылғы 12 қазандағы «Транспорт-логистика жүйесін дамытуға қатысты қосымша іс-шаралары туралы» қаулысында белгіленген.
Құжатқа сәйкес, 2026–2030 жылдары көлік-логистика жүйесін дамыту бойынша бірқатар мақсатты көрсеткішке қол жеткізу көзделген. Атап айтқанда, көлік және логистика қызметтерінің экспортын 3,5 млрд АҚШ долларына, ал республика аумағы арқылы транзиттік жүк тасымалының көлемін 18,5 млн тоннаға дейін жеткізу жоспарланған.
Сонымен қатар мемлекеттік шекара арқылы өткізу пункттерінің жүк өткізу қабілеті мен көлік-логистика орталықтарында контейнерлерді өңдеу қуаты екі есе арттырылады.
Қаулыға сәйкес, Әндіжан облысының Ханабад қаласы, Бұхара облысының Олот ауданы, Сұрхандария облысының Терміз ауданы, сондай-ақ Ташкент облысының Жаңажол және Ахангарон аудандары көлік-логистика саласына мамандандырылады.
Көлік-логистика орталықтарында терминалдарды басқару (TOS) және қоймаларды басқару (WMS) жүйелері енгізіледі. Олар 2030 жылдың соңына дейін Транспорт министрлігінің «E-logistika» платформасына қосылады.
Қаулыда көлік-логистика орталықтарына салықтық және кедендік жеңілдіктер беру де қарастырылған.
Атап айтқанда, белгіленген талаптарға сәйкес келетін орталықтар 2040 жылға дейін жер салығы мен мүлік салығынан толық босатылады. Ол үшін орталық ЭСКАТО-ның құрлық порттары туралы келісімге енгізілуі, тиісті жүйелерді енгізуі және «E-logistika» платформасында «BB» және одан жоғары рейтингке ие болуы қажет.
Көлік-логистика орталықтарының реестріне енгізілген орталықтарға 2029 жылғы 1 тамызға дейін республикада өндірілмейтін қойма жабдықтарын, жүк тиеу-түсіру техникасын, агрегаттар мен қосалқы бөлшектерді импорттау кезінде кедендік баж және міндетті сертификаттау бойынша жеңілдіктер беріледі.
Бұдан бөлек, 2026 жылғы 1 қарашадан бастап халықаралық курьерлік жөнелтілімдерді кедендік ресімдегені үшін алынатын қолданыстағы кедендік алым мөлшерлемесі 20 пайызға төмендетіледі.
Қаулыға сәйкес, 2027 жылғы 31 желтоқсанға дейін М₂, М₃ және N санаттарындағы көлік құралдарын өндіретін кәсіпорындарға республикада өндірілмейтін компоненттерді кедендік баж төлемей импорттауға рұқсат етіледі.
