Бу ҳақда Ижтимоий ҳимоя миллий агентлиги ҳамда Ижтимоий суғурта жамғармаси томонидан ўтказилган брифингда маълум қилинди.
Бу ҳақда Ижтимоий ҳимоя миллий агентлиги ҳамда Ижтимоий суғурта жамғармаси томонидан ўтказилган брифингда маълум қилинди.
Таъкидланишича, мазкур тартиб Президентнинг 2025 йил 3 ноябрдаги ПФ–206-сонли фармони асосида босқичма-босқич жорий этилаётган давлат ижтимоий суғуртаси тизимининг навбатдаги босқичи ҳисобланади.
Брифингда маълум қилинишича, жорий йил бошидан ҳомиладорлик ва туғиш нафақаларини проактив тайинлаш тизими ҳам ишга туширилган. Бунинг учун Ижтимоий суғурта ахборот модули ишлаб чиқилиб, 10 та вазирлик ва идоранинг ахборот тизимлари ўзаро интеграция қилинган.
Натижада йилнинг дастлабки беш ойида 81 мингдан ортиқ меҳнатга лаёқатсизлик варақаси автоматик тарзда кўриб чиқилди. Шундан 58 минг ҳолат бўйича қарийб 660 миллиард сўм миқдорида ҳомиладорлик ва туғиш нафақалари тайинланиб, тўлаб берилди.
Қайд этилишича, хусусий секторда меҳнат қилаётган аёлларга тўланадиган ҳомиладорлик ва туғиш нафақаси ҳажми ҳам сезиларли ошди. Бир нафар аёлга тўғри келадиган ўртача нафақа миқдори ўтган йилги 2,6 миллион сўмдан 14,8 миллион сўмгача кўтарилган.
Янги тартибга мувофиқ:
- касалликнинг дастлабки 5 куни учун нафақани иш берувчи тўлайди;
- 6-кундан бошлаб тўловлар Давлат ижтимоий суғурта жамғармаси маблағлари ҳисобидан амалга оширилади;
- 6 ойдан 8 йилгача суғурта стажига эга фуқароларга ўртача иш ҳақининг 60 фоизи миқдорида нафақа тайинланади;
- 8 йилдан ортиқ суғурта стажига эга фуқароларга эса ўртача иш ҳақининг 80 фоизи миқдорида нафақа тўланади.
Шунингдек, I ва II гуруҳ ногиронлиги бўлган шахслар, 18 ёшгача тўрт ва ундан ортиқ фарзанди бор оилалар ҳамда ногиронлиги бўлган фарзандни тарбиялаётган оилалар учун нафақа миқдори қўшимча 20 фоизга оширилади.
Янги тизим вақтинча меҳнатга лаёқатсизлик нафақаларини тайинлаш ва тўлаш жараёнининг шаффофлиги, тезкорлиги ҳамда ижтимоий ҳимоя самарадорлигини янада оширишга хизмат қилиши кутилмоқда.
