Ҳисобот даврида 385 нафар шахс, жумладан, 161 нафар қатағон қурбони оқланиб, реабилитация қилинди.

Жиноят ишларининг асосий қисми Тошкент шаҳри, Фарғона, Тошкент, Самарқанд ва Андижон вилоятлари ҳиссасига тўғри келган.

Кўриб чиқилган ишлар натижасида 57 376 нафар шахс судланган. Уларнинг 18 026 нафарига озодликдан маҳрум қилиш, 38 737 нафарига бошқа турдаги жазолар тайинланган, 613 нафари шартли ҳукм қилинган.

Судланганларнинг 50 435 нафари эркак, 6 941 нафари аёллардир. Шунингдек, уларнинг 21 670 нафари ёшлар, жумладан, 2 097 нафари вояга етмаганлар, 2 052 нафари эса 60 ёшдан ошган шахслар ҳисобланади.

Шу билан бирга, 6 377 нафар шахс озодликдан маҳрум этиш билан боғлиқ бўлмаган жазо тайинлангани муносабати билан суд залидан қамоқдан озод қилинди. Дастлабки тергов органлари томонидан 13 938 нафар шахсга нисбатан асоссиз қўйилган айблов моддалари чиқариб ташланди ёки қайта малакаланди.

47 нафар шахсга, жумладан, ёшлар ва аёлларга кафолат хатлари асосида озодликдан маҳрум қилиш билан боғлиқ бўлмаган жазолар тайинланди.

Бундан ташқари, 26 794 нафар шахс жазони ўташдан муддатидан илгари шартли озод қилинди, 8 761 нафар шахснинг жазоси енгилроқ жазо билан алмаштирилди.

Фирибгарлик ва ўғрилик билан боғлиқ ишлар кўпчиликни ташкил этган

Ҳисобот даврида судларда кўрилган жиноят ишларининг аксарияти қуйидаги жиноятларга тўғри келган:

  • фирибгарлик;
  • ўғрилик;
  • транспорт воситалари ҳаракати ёки улардан фойдаланиш хавфсизлиги қоидаларини бузиш;
  • гиёҳвандлик воситалари ва психотроп моддалар билан боғлиқ жиноятлар;
  • қасддан баданга енгил ва ўртача оғир шикаст етказиш;
  • ўзлаштириш ёки растрата йўли билан талон-торож қилиш;
  • безорилик;
  • ҳужжатлар, штамплар, муҳрлар ва бланкаларни қалбакилаштириш, сотиш ёки улардан фойдаланиш.

Жиноятларнинг сабаблари ва уларнинг содир этилишига имкон берган шарт-шароитларни бартараф этиш юзасидан 34 325 та хусусий ажрим чиқарилиб, тегишли ташкилотларга юборилган. Ярашув институти қўлланилиши натижасида эса 18 844 нафар шахс жиноий жавобгарликдан озод этилган.

Апелляция ва кассация тартибидаги ишлар

2026 йилнинг 9 ойида апелляция тартибида 8 659 нафар шахсга нисбатан 6 509 та жиноят иши кўриб чиқилди. Натижада 314 нафар шахсга нисбатан биринчи инстанция судлари чиқарган қарорлар бекор қилинди, 1 830 нафар шахсга нисбатан суд қарорлари ўзгартирилди.

Кассация тартибида 5 060 нафар шахсга нисбатан 4 504 та жиноят иши кўриб чиқилиб, 354 нафар шахсга нисбатан чиқарилган қарорлар бекор қилинди, 1 188 нафар шахсга нисбатан суд қарорлари ўзгартирилди.

Тафтириш тартибида эса 4 576 нафар шахсга нисбатан 3 931 та жиноят иши кўриб чиқилди. Ушбу тартибда 114 нафар шахсга нисбатан чиқарилган суд қарорлари бекор қилиниб, 492 нафар шахсга нисбатан қарорлар ўзгартирилди.

Шунингдек, Олий суднинг Жиноят ишлари бўйича судлов ҳайъати томонидан тафтиш тартибида 646 нафар шахсга нисбатан 567 та жиноят иши кўриб чиқилди. Натижада 95 нафар шахсга нисбатан қуйи судлар чиқарган қарорлар бекор қилинди, 188 нафар шахсга нисбатан суд қарорлари ўзгартирилди.