Тошкент шаҳар судлари матбуот хизмати маълум қилишича, 11 ноябрь куни эълон қилинган ҳукмга кўра, 1998 йилда туғилган, муқаддам судланган Фазлиддинхон Меҳмонов Жиноят кодексининг 165-моддаси (товламачилик), 168-моддаси (фирибгарлик) ва 248-моддаси (ўқотар қурол, ўқ-дорилар ва бошқа хавфли воситаларнинг қонунга хилоф муомаласи) бўйича айбли деб топилган.
Суд ҳукми билан унга 10 йил 3 ой муддатга озодликдан маҳрум қилиш жазоси тайинланган.
Шунингдек, 1991 йилда туғилган, муқаддам судланган Азиз Ғоипназаров Жиноят кодексининг 165-моддасида назарда тутилган товламачилик жиноятини содир этганликда айбли деб топилиб, 10 йил 1 ой муддатга озодликдан маҳрум қилинган.
Ҳар икки маҳкум жазони умумий тартибли колонияларда ўтайди. Бундан ташқари, Фазлиддинхон Меҳмоновдан жабрланувчиларга етказилган моддий зарарни ундириш белгиланган.
