Airbus A320 русумли самолёт маҳаллий вақт билан соат 22:22 да Тошкентга қўнди. Янги авиақатнов анъанавий сув аркаси билан кутиб олинди, йўловчиларга эса миллий таомлар тақдим этилди.
Биринчи рейс билан Бишкекдан Тошкентга 163 нафар йўловчи етиб келди. Тошкентдан Қирғизистон пойтахтига қайтиш рейси учун эса 74 нафар йўловчи рўйхатдан ўтди.
«Aero Nomad» ушбу йўналишдаги парвозларни ҳафтасига икки марта — пайшанба ва якшанба кунлари Airbus A320 самолётларида амалга оширади.
Шу тариқа, «Aero Nomad» Тошкент — Бишкек йўналишида мунтазам парвозларни амалга ошираётган учинчи авиакомпанияга айланди. Айни пайтда икки пойтахт ўртасидаги тўғридан-тўғри рейсларни «Uzbekistan Airways» ва «Centrum Air» ҳам амалга оширмоқда.
Қирғизистон авиакомпанияси келгусида Ўзбекистондаги йўналишлар тармоғини кенгайтиришни ҳам режалаштирмоқда. Хусусан, Бишкекдан Самарқанд ва Урганчга тўғридан-тўғри парвозларни йўлга қўйиш имконияти кўриб чиқилмоқда.
«Aero Nomad» 2021 йилда ташкил этилган бўлиб, Бишкек халқаро аэропортида жойлашган. Авиакомпания Airbus A320 оиласига мансуб ҳаво кемаларида мунтазам ва чартер рейсларини амалга оширади.
