Қозоғистоннинг «Йўловчи ташиш» АЖ шу йилнинг 1 октябридан бошлаб Олмаота — Тошкент йўналишида «Аёллар вагони» хизматини йўлга қўяди. Бу ҳақда “24kz” хабар берди.
Компания маълумотига кўра, мазкур қарор Қозоғистон ва Ўзбекистон ўртасидаги ушбу халқаро йўналишга талаб юқорилиги ва йўловчилар оқими ошиб бораётгани муносабати билан қабул қилинган.
Қайд этилишича, «Аёллар вагони» хизмати Қозоғистон ички темир йўл йўналишларида ҳам талабгир бўлиб, у жорий этилганидан буён 946 минг нафардан ортиқ йўловчи ушбу хизматдан фойдаланган.
Ҳозирда Олмаота — Тошкент поезди ҳар куни қатнайди. Поезд Алмати станциясидан 19:05 да жўнаб, Тошкентга 12:53 да етиб келади. Тошкентдан эса 14:41 да жўнаб, Алматига 08:51 да етиб боради.
Янги вагоннинг ишга туширилиши билан «Аёллар вагони» хизмати мавжуд бўлган темир йўл йўналишлари сони 14 тага етади. Улар орасида Алмати — Тошкент халқаро йўналиши ҳам бор.
«Аёллар вагони»да катта ёшдагилар ҳамроҳлигида 7 ёшгача бўлган ўғил болаларнинг ҳам ҳаракатланишига рухсат берилади. Бундай вагонларга чипталар фақат аёллар учун сотилади ва йўловчиларга фақат аёл кузатувчилар хизмат кўрсатади.
Чипта расмийлаштирилаётганда «ЖН» белгиси ўрин «Аёллар вагони»га тегишли эканини англатади.
Чипталар поезд жўнашидан 45 кун олдин сотувга чиқарилади.
