Маълум қилинишича, 2025 йил август ойида Давлат хавфсизлик хизмати Чегара қўшинлари, Ички ишлар ва Божхона идоралари ҳамкорлигида ўтказилган тезкор тадбирда Андижон вилояти Пахтаобод туманида ҳаракатланаётган “Matiz” русумли автомашина тўхтатиб текширилган.
Текширув давомида 1984 йилда туғилган, муқаддам гиёҳвандлик воситалари савдоси билан боғлиқ жиноят учун судланган шахсга тегишли қарийб 2 килограмм “гашиш” моддаси ҳамда электрон тарози аниқланган.
Шунингдек, у жиноий гуруҳ етакчиси экани маълум бўлиб, унинг яшаш манзилидан яна 2 килограммдан ортиқ “гашиш” топилган.
Тезкор тадбирлар давомида гуруҳнинг 1975, 1976 ва 1993 йилларда туғилган яна 3 нафар аъзоси ҳам ушланиб, улардан жами 391 грамм “гашиш” ва 542 грамм марихуана мусодара қилинган.
Терговда аниқланишича, гуруҳнинг яна 1981, 1984 ва 1989 йилларда туғилган аъзолари Қирғиз Республикасидаги наркосавдогарлардан гиёҳвандлик воситаларини қабул қилиб олиш, чегара орқали олиб ўтиш ва белгиланган манзилга етказиш билан шуғулланган.
Маълумотларга кўра, жиноий гуруҳ фаолияти давомида қарийб 10 килограмм “гашиш” моддасини ноқонуний айланмага киритган.
Жиноят ишлари бўйича Избоскан туман суди ҳукмига кўра, гуруҳ аъзолари Жиноят кодексининг 246 ва 273-моддалари билан айбли деб топилиб, 8 йилдан 11 йилгача муддатга озодликдан маҳрум қилинди.
