Бу ҳақда Американинг USA Farm Labor компанияси асосчиси ва бош директори Мануэл Фик биринчи Тошкент халқаро миграция форуми доирасида маълум қилди.
Унинг таъкидлашича, компания Ўзбекистон ҳукумати билан ҳамкорликда мамлакат фуқаролари учун АҚШдаги қишлоқ хўжалиги соҳасида амал қиладиган «H-2А» дастурида иштирок этиш имкониятларини кенгайтириш устида иш олиб бормоқда.
Манвел Фикка кўра, мазкур ҳамкорлик бир томондан АҚШдаги иш берувчилар учун ишчи кучи етишмаслиги муаммосини ҳал қилишга хизмат қилса, иккинчи томондан ўзбекистонлик фуқароларга хорижда меҳнат қилиб, даромад топиш ва турмуш шароитини яхшилаш имконини яратади.
Шу билан бирга, у АҚШда меҳнат ҳуқуқларини ҳимоя қилиш бўйича кучли тизим шаклланганини таъкидлади. Қайд этилишича, мамлакатда меҳнаткашлар хавфсизлигини таъминлаш, эксплуатациянинг олдини олиш ва инсон савдосига қарши курашишга қаратилган қонунлар ҳамда механизмлар амал қилади.
Унинг сўзларига кўра, АҚШга мавсумий қишлоқ хўжалиги ишлари учун 10 ойгача муддатга борадиган ўзбекистонлик ишчилар муносиб меҳнат шароитлари ва зарур ҳуқуқий кафолатлар билан таъминланади.
Компания раҳбари ишчилар томонидан олинадиган даромадлар уларнинг оилалари учун муҳим молиявий ёрдам бўлишини, бу эса турмуш фаровонлигини оширишга хизмат қилишини билдирди.
Шунингдек, мазкур ҳамкорлик иқтисодий самара билан бирга икки давлат ўртасида тажриба, билим ва касбий кўникмалар алмашинувини ҳам кучайтириши қайд этилди.
Мануэл Фиcк америкалик иш берувчилар Ўзбекистондан ёш, меҳнаткаш ва инглиз тилини биладиган малакали ишчиларни жалб қилишдан манфаатдор эканини ҳам таъкидлади.
