Қарорга кўра, давлат хизмати Ягона интерактив давлат хизматлари портали (ЯИДХП) ва давлат хизматлари марказлари орқали кўрсатилади.
Ариза берувчилар – давлат органлари ва юридик шахслар.
Хизмат “Ўзархив” агентлиги, Ўзбекистон миллий архивлари, Қорақалпоғистон Республикаси, вилоятлар ва Тошкент шаҳри архив иши ҳудудий бошқармалари томонидан кўрсатилади.
ЯИДХП орқали мурожаат этилганда сўровномани ЭРИ билан тасдиқлаш талаб этилмайди ва тўлов суммасининг 90 фоизи тўланади.
Ариза берувчи давлат хизматидан фойдаланишдан бош тортганда тўланган тўлов суммаси қайтарилмайди.
Давлат хизматларини кўрсатиш рад этилганда ариза берувчи хабарнома юборилган санадан бошлаб 30 иш куни ичида камчиликларни бартараф этган ҳолда тўлов тўламасдан қайта ариза бериши мумкин.
Экспертиза натижасида келишилган ҳужжат лойиҳасига ўзгартириш ёки қўшимчалар киритилганда, у умумий тартибда қайтадан экспертизадан ўтказилиши шарт.
Давлат архивларининг архив иши ва иш юритишга оид ҳужжатлари лойиҳалари экспертизадан ўтказилмайди.
Хизмат кўрсатиш муддати ва тўлов миқдори (1 та ҳужжат лойиҳаси учун):
сақлаш муддати кўрсатилган соҳавий ҳужжатлар рўйхати – 30 иш куни, БҲМнинг 10 баравари (фақат давлат органлари, республика ижро этувчи ҳокимият органлари ва хўжалик бирлашмалари томонидан тақдим этилади);
иш юритиш ва ижро назоратини ташкил этиш бўйича йўриқнома – 15 иш куни, БҲМнинг 2 баравари;
ҳужжатлар йиғмажилдлари номенклатураси – 15 иш куни, БҲМнинг 5 баравари;
идоравий архив, архив иши ва иш юритиш соҳасидаги марказий эксперт комиссияси ҳамда эксперт комиссияси тўғрисидаги низомлар – 10 иш куни, БҲМнинг 1 баравари;
ҳужжатлар йиғмажилдларининг архив рўйхатлари ва ҳужжатларни йўқ қилишга ажратиш тўғрисидаги далолатнома – 15 иш куни, БҲМнинг 2 баравари.
