Бир пайтлар пахта етиштириш учун одамлар томорқасигача, томигача пахта эккан, теримга жалб қилинган даврларни яхши эслаймиз. Ўшанда ҳисоботларга қўшиб ёзишларни аралаштириб ҳам бугунги кўрсаткичларга эришилмаган.

Бугун эса янги агротехнологиялар, механизация ва пахтачиликка ўзгача ёндашув туфайли шундай баракали ҳосил олинмоқда. Энг муҳими, бунинг учун одамларни оммавий равишда далаларга сафарбар қилишга, мажбурий меҳнатга эҳтиёж қолмади.

Демак, ердан юқори ҳосил олиш учун одамларни қийнаш шарт эмас экан. Тўғри ташкил этилган меҳнат, замонавий техника ва самарали агротехнологиялар билан ҳам катта натижага эришиш мумкинлигини бугунги рақамлар аниқ-тиниқ кўрсатиб турибди.