Шулар ҳақда ўйлар эканмиз, дафъатан хаёлимизда ёруғ фикрлар тизила бошлайди.
Бир эътироф қуввати
Яқинда, июль ойи бошида Президентимиз Шавкат Мирзиёев давлат ташрифи билан Грузияда — Тбилиси шаҳрида бўлди.
Грузия Бош вазири Ираклий Кобахидзе: “Дунёда раҳбарлар танқислиги сезилади, аммо Ўзбекистонда буюк бир етакчи бор. У Ўзбекистонни ривожлантиришга тўлиқ ўзини бағишлаган чинакам раҳбар. Унинг улкан ютуқлари ўзининг шахсий етакчилиги самараси”, деди.
Бу эътироф қуввати бизни янада фидойи бўлишга ундайди. Негаки, бугунги таҳликали шароитда, халқимиз гўзал ҳаётни орзу қилиб турган бир даврда биз ҳеч қачон хотиржамлик ва бепарволикка берилмаслигимиз керак, янада кўпроқ ҳаракат қилишимиз, қийинчиликлардан қўрқмасдан фақат олдинга интилишимиз зарур.
Янги Ўзбекистон орзусини амалга ошириш учун биз, албатта, Янги Ўзбекистон йўлидан боришимиз керак. Бу нима дегани?
Ғоя ҳамиша бир киши томонидан илгари сурилади. Уни қабул қилиш ва қўллаб-қувватлаш, бир бутун халқ бўлиб ана шу ғояни амалга ошириш эса ҳар доим жамоавий бирлашишни, миллий бирдамликни талаб қилган.
Янги Ўзбекистон орзуси билан яшаётган халқимиз бугун мана шу ягона ғоя атрофида бирлаша олди. БУ ОРЗУ — КЎП МИЛЛАТЛИ ХАЛҚИМИЗНИНГ БУЮК МАҚОМИНИ ТИКЛАШ МАҚСАДИ.
Орзуларимизнинг юксалаётгани ҳақида ҳали кўп тўхталамиз. Шу ўринда Президентимиз Шавкат Мирзиёев Тошкент вилоятининг Ўрта Чирчиқ тумани ва Нурафшон шаҳрига ташриф буюриб, ҳудудда амалга оширилаётган бунёдкорлик ишлари билан танишгани ҳақида икки-уч оғиз гаплашсак.
Ислоҳотларнинг ҳаётбахш сири
Тошкент катта ҳалқа йўлидан келиб, яйдоқ далани иккига бўлиб ўтган йўлдан ичкариладик. Саратоннинг чилласида кун чошгоҳ бўлганига қарамай, ёқимли шабада эсади. Кенгликни кўриб кўзингиз қувнайди. Беихтиёр танга роҳат берадиган об-ҳаводан завқ олиб, йўл юриш истаги туғилади. Йўлда ҳикмат кўп. У инсонни тоблайди. Янги манзиллар сари бошлайди. Шу билан бирга, ҳақиқий дўстлар ҳам йўлда — унинг синовлари чоғида топилади. Айни жиҳат сабабли ҳам йўл қадрлидир.
Тошкент — Самарқанд пуллик муқобил автомобиль йўлининг старт олган нуқтасида туриб, қалбимизни ажиб туйғулар эгаллади. Шунингдек, тарихда асрлар оша халқларга хизмат қиладиган йўлга асос солган шахслар ҳақида ўйладик. Улар саноқлигина экан! Халқ ва келажакка муносиб йирик лойиҳага бош бўлиш унча-мунча кишига насиб этавермас экан-да!
Сўнг беихтиёр “Темур тузуклари” китобидаги қуйидаги сўзлар ёдга тушди: “Амр қилдимки, хароб бўлиб ётган ерларда коризлар қурсинлар, бузилган кўприкларни тузатсинлар, ариқлар ва дарёлар устига янги кўприклар қурсинлар, йўл устида ҳар манзилгоҳга работлар қурсинлар.
Йўлларга кузатувчи ва соқчилар қўйсинлар, ҳар бир работга бир нечта одамни жойлаштирсинларки, йўлларни кузатиш ва сақлаш ишлари шуларга тегишли бўлсин. Йўловчилар молларини ғафлат босиб, ўғирлатиб қўймасликларининг вазифаси ҳам ўшаларнинг зиммасида бўлсин”.
Яна ўйлаб қоламиз. Дунёда яна қанча давлат раҳбарлари Темур бобомиз каби фармонлар берган экан-а? Аниқ билмаймиз. Лекин улардан саноқли шахсларгагина ғоясини ҳаётий ҳақиқатга айлантириш насиб этган. Ана шундай хаёллар мамлакатимизнинг бугуни ҳақида мушоҳада юритишга ундайди.
Ўтган қисқа даврда мамлакатимизда ЯНГИ ЎЗБЕКИСТОН ЙЎЛИга асос солинди. Олдимизга жуда катта марраларни қўйиб, ана шу чўққи сари дадил бормоқдамиз. Бу нафақат ўзбекистонликлар, балки бутун Марказий Осиёни бирлаштирди.
Шу ўринда кичик мулоҳаза. Йирик тошни болға билан уриб ҳам қумдай майдалаш мумкин. Буни билагида кучи бор исталган киши эплай олади. Аммо заррани бирлаштириб, бир бутун қилиш машаққатини ҳамма ҳам зиммасига олавермайди. Турли миллат ва элатдан иборат мамлакатни бир мақсад атрофида бирлаштириш, ягона халқ, бир бутун ватан қилиб шакллантириш ҳам ана шундай машаққатли, унча-мунча киши уддалай олмайдиган вазифа. Бу ишни ҳақиқий етакчиларгина эплай олади. Айни ҳақиқатга уч минг йиллик давлатчилигимиз тарихида кўп бора гувоҳ бўлдик.
Янги Ўзбекистонда бошланган янгиланишлар халқимизни бирлаштира олгани билан ҳам катта тарихий воқеликдир. Унинг нечоғлиқ машаққатли юмуш эканини эса мазкур иш бошини тутганлар каби ҳеч ким билмайди, ҳис эта олмайди. Аммо битта инкор этиб бўлмас ҳақиқатни барчамиз яхши англаймиз. Ўқилдиздан қувват олиш яшовчанликни оширади. Ислоҳотларнинг ҳаётбахшлигининг сири ҳам шунда. Яъни тарихий илдизларимизни замонавий келажак қоидаларига, унинг талаб ва таклифларига муносиб тарзда давом эттиряпмиз.
Биз босиб ўтаётган йўлни таҳлил этган киши Амир Темур бобомиз тузукларида келтирилган ҳолатга жуда ўхшаш вазиятни кузатади. Масалан, сўнгги йилларда қаровсиз ерлар обод қилинди. Худди Темур салтанатида бўлгани каби сувсиз жойларга коризлар қурилди. Қувурлар тортилиб, ариқлар бетон қилиниб, сув олиб чиқилди. Бузилган кўприклар тузатилиб, янгилари барпо этилди. Йўл устидаги ҳар манзилгоҳда работлар бунёд этилмоқда. Буни қурилиши бошланган пуллик муқобил йўл мисолида олиб кўрсак. Мазкур йўл бўйида логистика марказлари, омборлар, саноат ва агросаноат корхоналари, савдо-сервис, меҳмонхона ва туризм объектлари қурилади.
Тарихдан маълум — бундай карвонсаройлар савдо, иқтисоднинг қон томирига айланиб, халқнинг фаровонлигига хизмат қилади. Ана шу тўкинликнинг яна бир илдизи эса тинчлик ва хотиржамликда. Шу боис, янги қурилаётган йўлда хавфсизлик масаласига жиддий қаралмоқда.
Бу кунларга осонликча етиб келмадик
Сўзимиз аввалида Янги Ўзбекистон йўлига асос солингани ҳақида айтган эдик. Мамлакатимиз тараққиёт йўли, бунёдкорлигидаги мутлақ янги босқич, замонавий йўл мисолида кейинги йиллардаги ютуқларимизнинг айримларини таҳлил этсак.
Биринчидан, мамлакатимизда иқтисодий қувватларни оширишга жиддий эътибор қаратилди. Тадбиркорларга ҳақиқий маънода имкониятлар пакети яратиб берилди. Уларга мамлакатнинг таянч устунларидан бири дея қараш шаклланди. Бунга қонунларни замон талабига мослаш ва уларга амал қилишни қатъий белгилаш орқали эришилди.
Иккинчидан, халқни рози қилиш йўлидаги давлат сиёсати ва жамиятни юксалтириш ҳаракатлари моддий қувватни маънавий қудрат билан бирлаштирди. Ҳаётимизга ижтимоий масъулият деган атама кириб келди. Нафақат кириб келди, балки фаолиятимизнинг бир қисмига айланди.
Учинчидан, айни вазиятни жиддий, зарурат бўлганида танқидий таҳлил этиб, янада баланд марраларни олишда изчилликка эришилмоқда. Шу орқали ҳозиргидай тез ўзгарувчан мураккаб геосиёсий ва иқтисодий жараёнларда ҳам тараққиётдан тўхтаб қолмасликка эришиляпти.
Шу каби жиҳатларни яна узоқ санаш мумкин. Лекин шунинг ўзиданоқ бир ҳақиқатни — Янги Ўзбекистон йўлини яратиб, ундан кўзланган марра сари юриш ўз-ўзидан бўлиб қолмаётганини англаш мумкин!
Биргина мисол, шу пайтгача юртимизга хорижий сармоядорлар деярли келмасди. Аксинча, ўзимизнинг тадбиркорларимиз хорижга кетиб ишлаш ҳақида ўйларди. Негаки, ҳар қадамда тадбиркорни текшир, фалон фоизда фойда солиғи ол, уни четлаб ўтишга уриняптими, аёвсиз жазола деган қараш бор эди. Солиқ юки сабаб битта корхона очилса, учтаси ёпиларди. Битта тадбиркор бир вақтда икки-учта масъулияти чекланган жамият очар, бирини банкрот қилиб, иккинчисида фаолиятини давом эттирарди. Чунки солиқ юки баланд эди. Текширишлар жондан ўтарди. Шу боис, текширишларнинг имтиёзли даври тугаши билан субъект ҳам банкрот дея эълон қилинарди. Ачинарлиси, ҳақиқий банкротлик сабаб ёпилган корхоналар ҳужжатини тўлиқ ёпиш учун ҳам тадбиркор йиллаб сарсон бўларди. Ана шундай вазиятда хориждан сармоядор келмаслиги табиий эди-да!
Янги Ўзбекистондаги ислоҳотлар сабаб барчаси тубдан ўзгарди. Мамлакатимиз етакчиси тадбиркорларни қўллаб-қувватлаб, уларга кенг имкониятлар яратиб берди. Ишбилармонлик тинимсиз изланиш, янгилик қилиш дегани. Шуни ҳисобга олиб, имкониятлар пакети изчил таҳлил этиб бориладиган, зарур вақтда ўзгартиш ва қўшимчалар киритиладиган тизим яратилди. Бунинг учун эса шахсан давлатимиз раҳбари ишбилармонларнинг таклиф ва ташаббусларига қулоқ тутмоқда. Ҳар йили август ойида улар билан мулоқот қилиняпти.
Натижа ҳам шунга яраша қувонарли. Биргина мисол, йил бошидан буён мамлакатимиз иқтисодиёти 8,5 фоизга ўсди. Саноатда 8 фоиз, хизматларда 16,9 фоиз, қурилишда 13,8 фоиз, қишлоқ хўжалигида 4,7 фоиз ўсиш таъминланди. Инвестициялар ҳажми 28 миллиард долларга, экспорт 14,4 миллиард долларга етди. Бу кўрсаткичлар бежиз эмас. Ахир ҳозир олис қишлоқ ва овуллардаги тадбиркорлар ўз маҳсулотини тўғридан тўғри хориж бозорига чиқаряпти.
Ютуқларимиз ҳаққоний ва ҳаётий бўлгани учун ҳам халқаро даражада тан олинмоқда. Масалан, “Fitch” ва “Moody’s” халқаро рейтинг агентликлари мамлакатимиз суверен кредит рейтингини бир поғона яхшилади.
Шунинг ўзиёқ Ўзбекистонга ишонч билдирилаётганини кўрсатади. Мазкур ишончнинг аҳамияти шундаки, мамлакатимизга хорижлик сармоядорларнинг қизиқиши янада кучаяди. Маблағ олиб келиш имкониятимиз кенгаяди.
Муҳими, яширин иқтисодиёт учун жазо чораси ҳам енгиллаштирилди. Ҳатто имтиёзли равишда рўйхатга олиш ва қонуний фаолият учун йўл-йўриқ кўрсатилиб, зарур ёрдамлар берилмоқда. Натижада жамиятимизда эртанги кунга ишонч ортиб, тадбиркорларимиз ватан тараққиёти йўлида бирлашмоқда.
Ижтимоий
масъулият кучи
Юқорида ҳаётимизга ижтимоий масъулият деган ибора кириб келганини айтган эдик. Аслида, бу жуда қувончли ҳолат. Унинг ўзини алоҳида бир мақола сифатида таҳлил қилиш мумкин. Чунки ижтимоий масъулият жамиятда бирдамликни, аҳилликни шакллантирадиган катта куч.
Айни ўринда яқин тарихимизга назар ташласак. Халқимизни ичидан бўлиб, уни осон бошқариш учун бойларни ёмонлаб кўрсатиш ҳолати бўлган. Биз бир асрдан кўп вақт мобайнида бойларимизни ёмон кўриб яшадик. Янги Ўзбекистон нафаси кириб келгач, ҳақиқий мулк дахлсизлигини ҳис этиб, тадбиркорларимиз ҳам эмин-эркин иш юритадиган бўлди.
Ана шу ўзгаришлар фонида тадбиркорларнинг дунёқараши ҳам ўзгарди. Улар ўз ихтиёри билан маҳалласини обод қилиб, ижтимоий ҳимояга муҳтожларга кўмак берадиган шахсларга айланди. Яъни ижтимоий масъулиятни илмий атама деб эмас, ҳаётий зарурат сифатида қабул қилиш бошланди. Бу ҳолат эса жамиятимизда бир ватан, ягона халқ бўлиб яшаш руҳини уйғотди, кучайтирди.
Таъкидлаганимиздек, тараққиёт бир жойда тўхтаб турмайди. Айниқса, ҳозиргидек тез ўзгарувчан даврда бу янада долзарблик касб этади. Шу маънода, юртимизда барча соҳадаги кўрсаткичлар вақти-вақти билан таҳлил этилиб, янги режалар белгилаб олинмоқда.
Масалан, Президентимиз раислигида ҳудуд ва тармоқларда ўсиш суръатларини таъминлаш бўйича жорий йилнинг биринчи ярмида эришилган натижалар ва йил якунигача амалга ошириладиган устувор вазифалар муҳокамаси юзасидан ўтказилган видеоселектор йиғилишида иқтисодий кўрсаткичлар танқидий таҳлил қилинди. Бу бежиз эмас. Ҳозирги давр ютуқларни маҳкам ушлаб, янада баланд марраларни кўзлаб ҳаракат қилишни талаб этмоқда. Шу боис, давлатимиз раҳбари 40 миллионлик аҳолимиз ҳаётини яхшилаш учун 9-10 фоизли иқтисодий ўсиш зарурлигини таъкидлади. Бунинг учун ҳудуд ва тармоқ раҳбарлари мавжуд имкониятларни тўлиқ ишга солиши, ҳар бир лойиҳа ва ҳар бир корхона бўйича аниқ натижага ишлаш кераклиги кўрсатиб ўтилди.
Буни бежиз эсламадик. Тамал тоши қўйилган муқобил пуллик йўл Ўзбекистон ўз тараққиётининг буткул янгича босқичига кўтарилганини англатади. Масалан, Тошкентдан Самарқандга етиб бориш вақти ҳозирги 5 соатдан 2,5 соатга қисқаради. Айни рақам тадбиркор учун жуда муҳим. У маҳсулотини тез, осон ва хавфсиз йўлдан кўзланган манзилига осон етказа олиш имконига эга бўлади. Йўллардаги логистика марказлари каби муҳим нуқталар эса бу ишдаги самарадорликни янада оширади.
Ўрни келганда айтиш зарур, бу фақат Тошкент билан Самарқандни боғлайдиган йўл эмас. Тошкент, Сирдарё, Жиззах вилоятлари учун ҳам муҳим стратегик аҳамиятга эга. Айни дамда Самарқанд орқали ўтиладиган Қашқадарё, Сурхондарё вилоятлари аҳлининг ҳам пойтахтга етиб келишини тезлаштиради. Қорақалпоғистон Республикаси, Хоразм, Бухоро ва Навоий вилояти аҳли учун ҳам ана шундай енгилликларни беради. Бугун биз осонгина айтаётган равон йўлларга етиб келишимизда кўп машаққатли дамлар бўлган.
— Бир пайтлар қўшнилар билан муносабатимиз ёмонлашди. Бу ҳаммага бирдек зарар эди. Йўллар ёпилди. Экспорт-импорт масаласи мураккаб вазиятга айланди, — дейди йўл қурилиши соҳаси меҳнат фахрийси Муродулла Абдуллаев. — Ҳурматли Президентимиз фаолият бошлагач, ҳаммаси ўзгарди. Дастлаб яхши қўшничилик анъаналари тикланди. Сўнг йўлларимиз очилди. Шу соҳани яхши билган инсон сифатида айта оламанки, бир метр йўл қуришнинг ўзи бўлмайди. Бир пайтлар арзимас жойларни таъмирлаш учун ҳам идорама-идора сарсон бўлардик. Бугун мамлакатимизда соҳага катта маблағ ажратиляпти. Давлатимиз раҳбарининг ўзи назоратга олиб, йўлларни равон қиляпти. Ўзбекистон Марказий Осиёнинг хабига айланмоқда. Халқимиз нега кўзи қувониб, хурсанд бўлиб юрибди! Йўли текис, иши унумли бўлгани учун-да!
Нурафшон.
35 йиллик орзу
2022 йил адоғи. Нурафшон шаҳрида “Янги Ўзбекистон” ва “Правда Востока” газеталари кунларини ўтказган эдик. Ўшанда Нурафшондаги Ёшлар марказига Тошкент йўли кўчаси бўйлаб бораётиб, ҳамкасбларимиздан бири йўлнинг ўнг томонига ишора қилиб, “Мана шу кенгликда янги, “ақлли” шаҳар қурилади”, дегани ёдимда.
2026 йил 22 июль. Ҳаш-паш дегунча орадан тўрт йил ўтибди. Президентимиз Шавкат Мирзиёевнинг Нурафшонга ташрифи муносабати билан яна ушбу шаҳар томон йўл олдик. Қурилишига старт берилган йўл ҳақидаги таассуротларимиз қоришиқ ҳолда тўрт йил олдинги кўча тасвирлари ёдга тушди. Тошкент йўли кўчаси бўйлаб олиб борилаётган улкан бунёдкорлик ишлари ҳисобига бугун кўча қандай кўринишга келганини тасаввур қилишга уринаман.
Бир пайт автоулов шиналаридан келаётган шувиллаган овоз бирдан тинади, ҳаракати равонлашади. Ташқарига қарайман: кенг ва равон кўча, йўлнинг икки томони боғ. Ўнг томонда Нурафшон сўзи туширилган баланд стела. Демак, “нур сочувчи”, “зиё тарқатувчи” шаҳар — Нурафшонга етиб келдик.
Кўча аввал кўрганимдан буткул ўзгарибди, боя тасаввур қилганимдан анча гўзал, файзли. Олти тасмали йўл бўйлаб қад ростлаган Ижтимоий ҳимоя мажмуаси каби қатор муҳташам бинолар, замонавий кўп қаватли уйлар, очиғи, одамнинг ҳавасини келтирадиган манзара. Айни кезда мамлакатимизда кейинги ўн йилда қурилиш соҳаси, шу жумладан, шаҳарсозлик бўйича катта мактаб яратилгани, асосийси, янги авлод қурувчиларимизнинг азму шижоати билан барпо этилаётган янги-янги мавзе ва шаҳарлар юртдошларимиз фаровонлигига хизмат қилаётганини ўйлаб, қалбимиз фахру ифтихорга тўлади.
Ҳайдовчи кейинги чорраҳадан ўнгга бурилишини айтади. Ҳа, бу ўша, тўрт йил олдин ҳамкасбим ишора қилиб кўрсатган манзил. Ҳозир бу жой қандай кўринишда экан деган савол хаёлимдан ўтиши ҳамон келган йўлимиздан ҳам кенг ва равон кўчага тушдик. Бояги саволлар ўрнини ҳайрат ва ҳавас эгаллади. Кўча бўйлаб Президент мактаби, университет, вилоят ташкилотларининг муҳташам бинолари, кўп қаватли турар жойлар қад ростлаган. “Ватанпарвар боғи”, матонатли ўзбек аёли Зулфия Зокирова хотирасига ўрнатилган ёдгорлик мажмуаси, хиёбонлар, сунъий кўл, амфитеатр ва фавворалар, кенг яшил ҳудудлар, велосипед ҳамда пиёдалар йўлаклари бу файзли гўшага янада тароват бағишлаган. Уларни кўриб ҳавас қилмай, ғурурланмай бўладими?! Ахир тўрт йил илгари бу ерлар бийдай яйдоқ жой эди. Қаранг, шунча қисқа вақтда вилоятдаги ижтимоий-иқтисодий масалаларга катта ечим бериш осон эмас. Бу жуда катта маблағ, меҳнат ва сабот талаб қилади. Ана шу жараёнда бутун бошли шаҳар бунёд этиш — АСЛ ҚАҲРАМОНЛИК!
Вилоятнинг буткул янгича қиёфага кирган маъмурий марказига ҳавас ва ҳайрат ила боқар эканмиз, Самарқандгача қуриладиган янги муқобил йўл, унинг атрофидаги инфратузилмани бунёд этишдаги шижоатнинг бежиз эмаслигига яна бир карра амин бўламиз. Ахир беш-олти йил олдинги ҳолат билан таққослаганда, ҳозирги кунлар эртакка ўхшайди.
Айни ўринда яна бир жиҳатга эътибор қаратсак. Нурафшон мамлакатимизда “ақлли шаҳар” модели асосида барпо этилаётган биринчи шаҳардир. Унда рақамли бошқарув, интеллектуал транспорт, энергия тежамкор технологиялар, маданий масканлар ва экологик инфратузилма ягона тизимга бирлаштирилмоқда.
“Янги Ўзбекистон” газетасидаги чиқишларимизда доим илм-фанга алоҳида эътибор берамиз. Малакали кадрлар, инсон капитали келажак кафолатидир. Биз Учинчи Уйғониш даврига асос солишдай катта маррани олганмиз. Темурийлар Ренессансининг асоси Соҳибқирон бобомизнинг адолатли ва халқпарвар сиёсати сабаб вужудга келди. Ўша даврда илм-фан, касб-ҳунарга ҳам алоҳида эътибор берилган. Натижа қандай бўлганини бугун барчамиз яхши биламиз.
Юқорида таъкидлаганимиздек, аждодларга муносиб ворис сифатида Янги Ўзбекистонни бунёд этмоқдамиз. Буни Нурафшоннинг “ақлли шаҳар” мақомини олаётганида ҳам кўришимиз мумкин. Ташриф чоғида Келажак технологиялари марказига ҳам тамал тоши қўйилди. Мажмуа сунъий интеллект ва рақамлаштириш борасида бутун мамлакатга хизмат қиладиган марказ бўлади. Тасаввур қиляпсизми, яқин-яқингача эътибордан четда бўлган ҳудуд бугун катта шаҳарга, мамлакатнинг стратегик марказларидан бирига айланди.
Нурафшонликлар юз-кўзидаги мамнуният, фахр ва ифтихорнинг туб замирида ҳам ана шу ислоҳотлар бор. Бунга “Янги Ўзбекистон” боғида мамлакатимиз раҳбарининг вилоят жамоатчилиги билан тантанали учрашуви чоғида яна бир бор гувоҳ бўлдик. Ушбу файзли боғдаги муҳитни, инсонлар юз-кўзидаги қувончни сўз билан ифодалаб бўлмайди. Уни фақат ҳис этиш мумкин.
Нуронийлар, вилоят фаоллари, ёшлар, қўйингки, тантанали тадбирнинг барча-барча иштирокчилари юзидан ҳаётдан розилик, эртанги кунига ишонч туйғулари балқийди. Ана шу шукроналик, қатъий ишонч порлаётган минглаб нигоҳларга боқиб, бир ҳақиқатни англайсиз: бу қарашлардаги улуғворлик, қатъият фақатгина янги шаҳар бунёд этилиши билан боғлиқ эмас. Бу — инсон қадрини улуғлашга йўғрилган Янги Ўзбекистон ислоҳотларининг ортга қайтмаслиги, халқимиз Лидери бошчилигида қўлга киритилаётган ютуқ ва тарихий натижаларимиз бардавом бўлишига қатъий ишонч ҳосиласидир.
Мезбонлардан бирини суҳбатга чорладик:
— Тошкент вилояти катта салоҳият, чексиз имкониятларга эга. Республика ялпи ички маҳсулотининг қарийб 10 фоизи вилоят ҳиссасига тўғри келиши ҳам буни тасдиқлайди. Маъмурий марказ — Нурафшон шаҳри ҳам шунга мос барпо этилаётган экан. Маҳобатига, “ақлли” ечимларига ҳавас қилдим.
— Нимасини айтасиз, шундай катта вилоятнинг маъмурий маркази йўқ эди, — дейди мезбон. — Илгари кўпчилик юртдошимиз “прописка”дан азоб чекиб, бизга ҳавас қилишини айтарди. Аслида, бундан энг кўп Тошкент вилояти аҳли қийналган.
Нигоҳимдан “қанақасига”, деган саволни уқади чоғи, оғиз жуфтламасимдан изоҳ бошлайди.
— Масалан, Самарқанд ёки қашқадарёлик бир инсон яхши ният билан уй оламан деб Тошкентга келди. “Прописка”си йўқлиги учун уй ололмаслигини билгач, қайтиб кетади. Бу ерда нима муҳим, биласизми?
Жавоб беришимни кутмасдан фикрини давом эттиради:
— Унда келган жойига қайтиб бориб, вилоят марказидан уй олиш имкони, яъни танлов бор. Бекобод ёки Оҳангаронни қўя туринг, шундоққина Ўрта Чирчиқнинг бир қишлоғида яшаган одам шаҳарга кўчиб боришни режа қилса-ю, у ҳам “прописка”си туфайли пойтахтдан уй ололмаслигини билса, айтинг, қаерга боради? Ҳа, афсуски, бизда шундай бўлган. Ҳозир бу масала ҳаммамиз учун ўтмишда қолди. Лекин барибир вилоятнинг ўз маъмурий маркази бўлгани яхши-да. Чунки бу жиҳат фақатгина уй билан боғлиқмас. Тошкент вилоятининг тиббиётидан тортиб, давлат идораларигача, барчаси ҳар томонда эди.
Шу пайт “Янги Ўзбекистон” боғига мамлакатимиз етакчиси кириб келди, йиғилганларни самимий қутлади.
— Бу ердаги ҳар бир корхона, ҳар бир кўча ва бино, майдон ва хиёбон серғайрат, меҳнаткаш ва фидойи вилоят аҳли билан биргаликдаги ишларимизнинг натижасидир, — деди Президентимиз.
Дарҳақиқат, бугун барчамиз ягона Ватан, ягона халқ бўлиб, янги ҳаёт ва келажак яратяпмиз. Шу ўринда бир ҳақиқатни таъкидлашни истардик. Жамиятни бирлаштириб, мамлакатни тараққиётга бошлашни кучли шахсларгина уддалай олади. Ислоҳотчи бўлиш инсондан ҳар жиҳатдан юксак салоҳият, эртанги кунни олдиндан кўриб, тезкор ва тўғри қарор қабул қила олишдай фазилатлар талаб этади. Айни сабаб туфайли ташқаридан қараганда КАТТА ВА БУЮК ИСЛОҲОТЧИ сифатида муҳтарам Президентимиз Шавкат Мирзиёев катта марраларни осонгина забт этаётгандай кўринади. Унинг уйқусиз тунлари, оромсиз кунлардаги машаққатини эса фақат тасаввур қилиш, бир оз ҳис этиш мумкин, холос.
Яна бир гап. Юқорида бунёдкорлик, тадбиркорлик, ижтимоий янгиланишлар фалсафаси ҳақида сўз юритдик. Энди эса юртимиздаги бу каби ўзгаришлар силсиласи халқимизни яна бир эзгу мақсад сари чорлай бошлагани ҳақида айтмоқчимиз.
Бу ерда гап ободлик ҳаракати тўғрисида.
Маънавий меросимизда “Ободлашмоқ” сўзи бор. У тобора обод бўлиб бормоқ маъносини англатади. Кейинги йилларда топган яна бир ҳақиқатимиз ҳаётимизга, турмуш тарзимизга, умуман, хоҳиш-истакларимизга жўр бўлаётган ободлик руҳидир.
Бизнинг заминда азал-азалдан рўзғорни озода тутиш, киши ўзи яшаётган атроф-муҳитни саришта сақлаш, табиат неъматларини асраб-авайлаш, уларни қадрлаш каби тарбия муҳити шаклланиб келган.
Бугун мана шу тарбия мактаби ўзининг янада гўзал қиёфаси билан қайта юз очмоқда. Бу ҳолнинг боиси нимада?
Гап шундаки, кейинги йилларда юртимизда кузатилаётган кенг миқёсли ислоҳотлар, аввало, маҳаллаларда, чекка-чекка қишлоқ ва овулларда бўй кўрсатмоқда. Буни одамлар ўз ҳаётида сезяпти. Аслида ҳаётнинг энг гўзал неъматлари фақат тинчлик ва фаровонлик ҳукм сурган заминдагина ўз хислатини намоён этади. Шу боис, бугун мамлакатимизда ҳукм сураётган барқарор тараққиёт муҳитида халқимиз яна ободлик муҳитига қайтди. Шунинг ўзи биз орзу қилган фаровонлик жамиятининг ёруғ муждаси эмасми?!
Хулоса ўрнида айтмоқчимизки, катта йўлга тушган улкан карвон — Янги Ўзбекистоннинг мураккаб геосиёсий жараёнлардаги ютуқлари замирида ана шундай ҳаётий ҳақиқатлар бор!
Салим ДОНИЁРОВ,
Ўзбекистонда хизмат кўрсатган журналист
