Бу Вазирлар Маҳкамасининг «Ёшларни оилавий ҳаётга тайёрлаш тизимини янада такомиллаштириш ҳамда оилавий маслаҳат хизматларини ташкил этиш чора-тадбирлари тўғрисида»ги қарорида белгиланди.

Ҳужжатнинг асосий мақсади — ёшларни оилавий ҳаётга тайёрлаш тизимини такомиллаштириш, ҳуқуқий ва психологик хизматлар кўрсатиш, ота-оналарни ўқитиш дастурлари орқали масъулиятли тарбия кўникмаларини шакллантириш ҳамда оилалардаги маънавий-ахлоқий муҳитни яхшилашдан иборат.

Мазкур пунктларда никоҳдан ўтаётган ёшлар, турмуш қурганига 5 йил бўлмаган ёш оилалар, турли муаммоларга дуч келган оилалар учун психологик, ҳуқуқий ва тиббий маслаҳат хизматлари кўрсатилади.

Шунингдек, ёшлар учун:
— гиёҳвандликнинг олдини олиш;
— оила иқтисодиёти ва бюджетини юритиш;
— репродуктив саломатлик асослари;
— оилавий-ҳуқуқий муносабатлар;
— маънавий-ахлоқий қадриятларни мустаҳкамлаш;
— оилавий низоларни зўравонликсиз ҳал қилиш маданиятини шакллантириш бўйича тренинглар ташкил этилади.

Қарор доирасида хотин-қизларга замонавий тадбиркорлик кўникмалари бўйича маслаҳатлар бериш, хавфсиз миграцияга кўмаклашиш, меҳнат бозорида талаб юқори бўлган касблар ва хорижий тилларга ўқитиш ҳам назарда тутилган.

Ҳужжат билан Оила ва хотин-қизлар билан ишлаш марказларидаги оилавий маслаҳат пунктларининг чора-тадбирлар режаси, марказлар фаолияти самарадорлигини баҳолаш учун KPI кўрсаткичларини ҳисоблаш тартиби тўғрисидаги низом тасдиқланди.

Қарор Қонун ҳужжатлари маълумотлари миллий базасида эълон қилинган бўлиб, 2026 йил 20 майдан кучга кирди.