Бу ҳақда "Ўзбекистон аэропортлари" АЖ маълум қилди.
Қайд этилишича, «Airbus A320» русумли самолёт Тошкент аэропортига соат 01:35 да келиб қўнди. Авиация анъанасига кўра, ҳаво кемаси сув аркаси билан кутиб олинди, йўловчилар ва экипаж аъзоларига миллий ширинликлар ҳамда гуллар тақдим этилди.
Янги йўналиш бўйича парвозлар ҳар куни «Airbus A320» самолётларида амалга оширилади. Бу Ўзбекистон ва БАА пойтахтлари ўртасида мунтазам тўғридан-тўғри авиақатновни йўлга қўйиш имконини беради.
«Etihad Airways»нинг Тошкентга қатновларни бошлаши Ўзбекистоннинг халқаро авиация алоқаларини кенгайтиришда муҳим воқеа ҳисобланади. Янги авиақатнов икки давлат ўртасидаги ишбилармонлик ва туризм алоқаларини ривожлантиришга хизмат қилиши баробарида, йўловчилар учун Абу-Даби орқали дунёнинг турли йўналишларига қулай транзит имкониятларини ҳам кенгайтиради.
Маълумот учун, «Etihad Airways» 2003 йилда ташкил этилган бўлиб, Абу-Дабида жойлашган БААнинг миллий авиакомпанияси ҳисобланади. Авиакомпания халқаро йўналишларда парвозларни амалга оширади ва хизмат кўрсатиш сифати бўйича халқаро рейтингларда юқори баҳоларга эга.
Шунингдек, «Etihad Airways» мустақил Британиянинг Skytrax агентлиги томонидан 4 юлдузли сифат сертификати билан тақдирланган.
