Бу ҳақда Фарғона вилояти Ички ишлар бошқармаси матбуот хизмати маълум қилди.
Аниқланишича, муқаддам Жиноят кодексининг 97-моддаси билан судланган, 2004 йили туғилган шахс жиноий гуруҳ етакчиси сифатида ёшларни ўз атрофига тўплаган.
Гуруҳ аъзолари Қиргули даҳасида мактаб ўқувчилари ва фуқароларни қўрқитиш, тан жароҳати етказиш билан таҳдид қилиш орқали телефон ва бошқа моддий қимматликларни ўғирлик, фирибгарлик ҳамда талончилик йўли билан қўлга киритган.
Шунингдек, жиноий тўда атрофига бошқа шахсларни жалб қилишга мунтазам уриниб келгани айтилмоқда.
Фарғона вилояти Ички ишлар бошқармаси ҳамда Давлат хавфсизлик хизмати ходимлари ҳамкорлигида ўтказилган тезкор тадбирлар натижасида гуруҳнинг ноқонуний фаолиятига чек қўйилган.
Қайд этилишича, жиноий гуруҳнинг барча аъзолари Жиноят-процессуал кодексининг 224-моддаси асосида вақтинча сақлаш ҳибсхонасига жойлаштирилган.
Тадбирлар давомида уяли алоқа воситалари, гуруҳ аъзоларидан биридан топилган гашиш гиёҳвандлик моддаси ҳамда совуқ қурол ашёвий далил сифатида расмийлаштириб олинган.
Ҳозирда ҳолат юзасидан терговга қадар текширув ҳаракатлари олиб борилмоқда.
