Reuters агентлиги хабар беришича, ҳалок бўлганлар орасида икки ва тўрт ёшли икки нафар бола ҳам бор. Улар ёпиқ автомобиль ичида ҳушидан кетган. Шунингдек, 80 ёшдан 95 ёшгача бўлган уч киши иссиқ уриши оқибатида вафот этган. Яна 13 киши хавфсиз бўлмаган жойларда чўмилаётган вақтда чўкиб кетган.
Бордо ҳудудида ҳарорат 41,9°C гача кўтарилиб, ўтган йил август ойида қайд этилган рекордни янгилади. Пуатье шаҳрида эса ҳарорат 41,2°C ни ташкил этиб, 1947 йилда ўрнатилган аввалги энг юқори кўрсаткичдан ошиб кетди.
Янги ҳарорат рекордлари Европанинг бошқа мамлакатларида ҳам қайд этилди. Сан-Себастьян шаҳрида ҳарорат 40°C га етди. Reuters Climate Monitor маълумотларига кўра, бу кўрсаткич 22 июнь куни учун шаҳардаги тарихий ўртача ҳароратдан икки баробардан ҳам юқори.
Буюк Британия метеорология хизматининг (Met Office) маълум қилишича, мамлакатнинг айрим ҳудудларида ҳафта охирига қадар ҳаво ҳарорати 39°C дан ошиб кетиши мумкин. Бу ҳолат 1957 ва 1976 йилларда қайд этилган 35,6°C ли рекордларни янгилаши эҳтимолдан холи эмас, деб хабар берди kommersant.ru.
