Олим Берлин шаҳридаги Германия Ташқи ишлар вазирлиги архивида бўлиб, ушбу муассасада ўзбек халқи ва давлатчилиги, шунингдек Турон–Туркистон тарихига оид манбалар мавжудлиги билан қизиқди.
Маълум қилинишича, архив раҳбарияти Тарих институтининг мазкур йўналишдаги изланишларини қўллаб-қувватлашини билдириб, тадқиқотчилар учун зарур шарт-шароитлар яратилишини маълум қилган. Шунингдек, архивда сақланаётган қатор қимматли ва ноёб ҳужжатлар билан таништирилган.
Аниқланган манбалар орасида ўтган асрнинг 20-йилларида юртимиздан Германия олий таълим муассасаларига ўқиш учун юборилган ёшларга оид материаллар ҳам бор. Шунингдек, уларни қўллаб-қувватлаш мақсадида Германияда ташкил этилган маданий комиссия фаолияти, Бухоро Халқ Шўролар Жумҳурияти тарихи ҳамда жадид маърифатпарвари Хайринисо Мажидхоновага доир ҳужжатлар топилган.
Мазкур манбалар Ўзбекистоннинг ХХ аср бошларидаги таълим сиёсати, халқаро алоқалари ва миллий зиёлилар тарихи бўйича янги маълумотларни илмий муомалага киритиш имконини беради.
