Унга кўра, Туркиянинг Limak İnşaat Sanayi ve Ticaret A.Ş. ҳамда Қатарнинг Hamad Bin Khalid Contracting Company W.L.L. компаниялари консорциуми ғолиб деб топилди.
Мазкур лойиҳа бўйича очиқ халқаро тендер 2026 йил 12 март куни “Қуриш — топшириш — бошқариш” (Build-Transfer-Operate — BTO) модели асосида эълон қилинган эди.
Тендер икки босқичда — малака сўрови (RFQ) ва таклифлар сўрови (RFP) шаклида ўтказилди. Аввал хабар берилганидек, олтита компания танловнинг якуний босқичига ўтган. Унинг натижаларига кўра, Идоралараро тендер комиссияси ғолиб консорциумни аниқлади.
Лойиҳа доирасида янги аэропортни қуриш ва бошқариш ишлари биргаликда амалга оширилади.
Хусусий шерик соатига 1 200 нафар йўловчига хизмат кўрсатиш қувватига эга янги йўловчи терминали, вокзалолди майдони, автотураргоҳ ҳамда тегишли инфратузилмани қуриш ва бошқариш учун масъул бўлади.
Давлат шериги эса аэродром мажмуаси, жумладан, учиш-қўниш йўлаги ва перронни қуриш ҳамда бошқариш вазифасини ўз зиммасига олади.
Кейинги босқичда умумий муддати 23 йилни, шу жумладан, уч йилгача бўлган қурилиш даврини қамраб олувчи давлат-хусусий шериклик тўғрисидаги битим тузилиши режалаштирилган.
Тендер ғолиби бўлган консорциум таркибидаги компаниялар халқаро аэропортлар ва йирик инфратузилма объектларини қуриш ҳамда бошқариш бўйича катта тажрибага эга.
Жумладан, Limak компанияси Косоводаги Приштина ва Сенегалдаги Дакар халқаро аэропортларини бошқаради. Шунингдек, Истанбул аэропорти қурилишида иштирок этган ва Мисрдаги Қоҳира аэропортидан кейин Қувайт халқаро аэропортининг янги терминалини қуриш ишларини олиб бормоқда.
HBK Contracting компанияси эса 2022 йилги футбол бўйича жаҳон чемпионати финал учрашуви ўтказилган Қатардаги “Лусаил” стадиони қурилишининг бош пудратчиси бўлган.
“Бухоро икки минг йилдан ортиқ тарихга эга Марказий Осиёнинг энг қадимий шаҳарларидан бири ҳисобланади. Унинг тарихий маркази 1993 йилда ЮНЕСКОнинг Бутунжаҳон мероси рўйхатига киритилган. Янги аэропорт ортиб бораётган меҳмонлар оқимини қабул қилиш ҳамда ҳудуднинг хорижий давлатлар билан авиақатновларини кенгайтиришга хизмат қилади.
Очиқ тендер эълон қилиниши йирик халқаро компанияларда катта қизиқиш уйғотди. Бухородаги лойиҳани амалга оширадиган жамоа йўловчилар учун замонавий инфратузилма ва қулай аэропорт барпо этиб, ҳудуднинг хорижлик сайёҳлар учун жозибадорлигини оширишга ва умуман, Ўзбекистон авиация соҳасини ривожлантиришга ҳисса қўшишига ишонамиз”, — дея изоҳ берди “Uzbekistan Airports” компанияси.
Эслатиб ўтамиз, “Янги Бухоро” халқаро аэропортини қуриш ва бошқариш бўйича ДХШ лойиҳаси Ўзбекистон Республикаси Президентининг 2024 йил 30 августдаги ПҚ–308-сон қарорига асосан “Uzbekistan Airports” АЖ томонидан Транспорт вазирлиги ҳамда Иқтисодиёт ва молия вазирлиги билан ҳамкорликда амалга оширилмоқда.
