«Жарима майдончаси» тизими Солиқ қўмитаси билан интеграция қилиниб, майдончаларда камералар ўрнатилади, талабларни бузган операторлар учун неустойка ва шартномани бекор қилиш чоралари белгиланди.
Ўзбекистонда ушланган транспорт воситаларини жарима майдончаларидан олиб чиқиш тартиби рақамлаштирилади. Бу Вазирлар Маҳкамасининг 2 июлдаги қарорида назарда тутилган.
Қарорга мувофиқ, 2026 йил 1 августдан бошлаб транспорт воситаларини сақлаш жойларидан чиқариш учун рухсатнома фақат маъмурий ишни кўриб чиқувчи орган (мансабдор шахс) ёки ижро органи томонидан «Жарима майдончаси» ахборот тизимида QR код билан тасдиқланиб, электрон шаклда юборилади.
Ҳужжатга кўра, Ички ишлар вазирлиги икки ой муддатда «Жарима майдончаси» ахборот тизимини Солиқ қўмитасининг ахборот тизимлари билан «Электрон ҳукумат» тизимининг идоралараро интеграциялашув платформаси орқали интеграция қилиши лозим.
Бунинг натижасида жарима майдончалари хизматини кўрсатувчи юридик шахслар ҳақидаги маълумотлар, жумладан уларнинг номи, СТИРи ва манзили, шунингдек, ушланган транспорт воситасининг маркаси, давлат рақами, майдончага киритилган ва чиқарилган вақти ҳамда ундирилган тўловлар солиқ органларининг ахборот тизимида автоматик шакллантирилади.
Шунингдек, ИИВ мазкур ўзгаришлардан келиб чиқиб, қонунбузарлик учун ушланган транспорт воситаларини сақлаш хизматини кўрсатувчи юридик шахслар билан қўшимча шартномалар тузиши ҳамда «Жарима майдончаси» ахборот тизимини бошқа давлат органлари ва ташкилотларининг ахборот тизимлари билан интеграция қилиб, уни такомиллаштириши белгиланган.
Қарорда бозорлар ҳудудидаги автотураргоҳлар фаолиятига оид қатор янги талаблар ҳам белгиланган. Хусусан, Марказий банк ва Солиқ қўмитаси уч ой муддатда бозорлар ҳудуди ва уларга туташ автотранспорт воситаларини вақтинча сақлаш жойларида тўловларни ягона QR код орқали амалга ошириш имкониятини яратиши керак.
Бундан ташқари, бозорлар ва савдо комплексларида автомототранспорт воситаларини доимий ва вақтинча сақлаш хизматини кўрсатувчи тадбиркорлик субъектлари электрон шлагбаум ёки транспорт воситалари кириш-чиқишини чекловчи бошқа қурилмаларни солиқ органларининг ахборот тизимларига интеграция қилиши шарт бўлади. Бу талаб бажарилмаган тақдирда Солиқ кодексига мувофиқ жарима қўлланади.
Шунингдек, қарор билан Вазирлар Маҳкамасининг 2011 йил 25 майда қабул қилинган, қонун ҳужжатлари бузилганлиги учун ушланган транспорт воситаларини жарима майдончаларига олиб келиш, жойлаштириш ва сақлаш тартибини белгиловчи 149-сон қарорига ҳам ўзгартириш ва қўшимчалар киритилмоқда.
Унга кўра, транспорт воситасини ушлаб туришга асос бўлган сабаблар тўлиқ бартараф этилмасдан туриб уни жарима майдончасидан чиқариш ёки ундан ноқонуний фойдаланиш ҳолатларининг олдини олиш мақсадида назорат фото ва видеоқайд этиш воситалари ҳамда Йўл ҳаракати хавфсизлиги хизмати ходимлари томонидан жойига чиққан ҳолда амалга оширилади.
Бундан ташқари, ушланган транспорт воситаларининг ҳисобини, уларни олиб келиш ва сақлаш бўйича кўрсатилган хизматлар сони ва ундирилган тўловларни «Жарима майдончаси» ахборот тизими орқали юритмаслик, шунингдек, транспорт воситасини ушлаб туриш сабаблари бартараф этилмасдан туриб уни чиқариб юбориш ёки ундан ноқонуний фойдаланиш учун шартномада базавий ҳисоблаш миқдорининг 20 баравари (8,24 млн сўм) миқдорида неустойка назарда тутилади. Агар бундай ҳолатлар бир йил ичида такроран содир этилса, бу шартномани бекор қилиш учун асос бўлади.
Шунингдек, жарима майдончаларига олиб келинган транспорт воситаларининг кириш-чиқиши «Жарима майдончаси» ахборот тизими орқали назорат қилинади, майдончалар давлат рақам белгиларини автоматик аниқлайдиган камера ва бошқа техник воситалар билан жиҳозланади. Ахборот тизимига киритилган хизматлар бўйича айланмалар эса солиқ органларининг ахборот тизимида автоматик шакллантирилади.
