Инсон ҳаёти, жамият тараққиётини хотин-қизларнинг самарали фаолиятисиз тасаввур этиб бўлмайди. Айни пайтда Ўзбекистонда илм-фан соҳасида 6000 дан зиёд аёл фаолият юритмоқда. Олийгоҳларда таҳсил олаётган қизлар сони 904 мингдан ошиб, жами талабаларнинг 54 фоизини ташкил этяпти. Стажёр-тадқиқотчилар ва докторантурада таҳсил олаётганларнинг ҳам 61 фоизи хотин-қизлардир. Бу эса юртимизда уларнинг илм-фан ривожидаги ўрни, инновацион ғоялари ҳамда халқаро ҳамкорликни кенгайтиришдаги аҳамияти ошаётганини кўрсатади. Мазкур ҳамкорлик илм йўлидаги хотин-қизларни янада руҳлантириб, халқаро доирада нуфузини оширишга хизмат қилади.

Тадбир доирасида кенг кўламли бизнес-форум, шунингдек, Ўзбекистон — Малайзия фан, таълим ва маданият кўргазмалари ташкил этилди. Мазкур платформалар турли ҳудуддан борган олий таълим муассасалари вакилларига илмий салоҳияти, инновацион ишланмалари ва таълим имкониятларини Малайзия аудиториясига кенг намоён этиш имконини берди.

Кўргазмалар давомида икки давлатнинг бой тарихий мероси, миллий қад­риятлари ва ўзига хос маданиятини акс эттирувчи ранг-баранг экспозициялар ҳамда замонавий ёндашув асосида ташкил этилган тематик стендлар намойиш этилди. Кўргазмалар форум иштирокчиларида катта қизиқиш уйғотиб, илмий ва таълимий алоқалар билан бир қаторда маданий-гуманитар ҳамкорликни янада мустаҳкамлашга хизмат қилди. Форумнинг фойдали жиҳати Ўзбекистон ва Малайзия олий таълим муассасалари ректорлари, проректорлари ҳамда делегациялари фаол иштирок этиб, самарали ҳамкорликка асос яратганида ҳам яққол намоён бўлди.

Тадбирда икки мамлакат ўртасидаги ҳамкорликни янги босқичга олиб чиқишга қаратилган 30 га яқин муҳим келишувга эришилди. Жумладан, Бухоро давлат техника университети ҳамда Султон Идрис номидаги таълим университети, Тун Ҳуссейн Онн номидаги Малайзия университети ҳамда Мелака техника университети ўртасида ҳамкорлик шартномалари имзоланди.

Мазкур келишувлар олий таълим тизимида тажриба алмашиш, қўшма илмий тадқиқотлар ўтказиш, академик мобилликни ошириш ҳамда замонавий таълим дастурларини жорий этишда муҳим аҳамият касб этади.

Ушбу форум икки мамлакат ўртасида илм-фан, таълим ва инновациялар йўналишида янги босқични бошлаб берувчи муҳим халқаро платформа сифатида  эътироф этилмоқда. Бунга асослар етарли. Чунки келишув ва мулоқотлар, ­амалий ҳаракатлар шунга асос яратади.

Садоқат СИДДИҚОВА,

педагогика фанлари бўйича

фалсафа доктори, доцент

Ҳамкорлик материали