Кўриб чиқилган масалаларнинг 23 таси рўйхатга олиш ва рухсат бериш, 20 таси эса кредит ва тўлов ташкилотларининг молиявий ҳолати билан боғлиқ бўлди.
Хусусан, пруденциал нормативлар ва қонунчилик талабларига риоя этилмагани, шунингдек, инспекция текширувларида аниқланган қоидабузарликлар учун 6 та банк ва 2 та микромолия ташкилотига нисбатан жарима санкциялари қўлланилди.
Бундан ташқари, яна 1 та банк ва 1 та микромолия ташкилоти чора ва санкциялар қўлланилиши тўғрисида огоҳлантирилди.
Рўйхатга олиш ва рухсат бериш йўналишида кредит ташкилотлари уставига киритилган ўзгартиришларни рўйхатдан ўтказиш, банкларда аудит ўтказиш ҳуқуқини берувчи аудиторлик малака сертификатларини тақдим этиш, микромолия ташкилотларини ҳисобга олиш, аккредитация ва тўлов ташкилотига лицензия бериш каби масалалар муҳокама қилинди.
Шунингдек, кредит ташкилотларининг устав фондидаги улушига эгалик қилишга рухсат бериш, тижорат банклари кузатув кенгаши ва бошқаруви аъзолари ҳамда муҳим аҳамиятга эга ходимлар номзодларини кўриб чиқиш масалалари ҳам кун тартибидан ўрин олди.
Молиявий ҳолатга оид масалалар доирасида Марказий банк кўрсатмалари ва пруденциал меъёрлар талабларига риоя этилиши, банк ва нобанк кредит ташкилотларидаги инспекция текширувлари натижалари, шунингдек, молиявий хизматларни «тартибга солиш қумдони» доирасида синовдан ўтказиш масалалари кўриб чиқилди.
