Маълум бўлишича, 2002–2004 йилларда туғилган икки йигит Инстаграм ижтимоий тармоғида саҳифа очиб, уни мунтазам равишда автомобиль пойгалари ва ўқотар қурол билан тасвирга олинган видеолар билан бойитиб келган.
Уларга Кармана тумани ва Навоий шаҳрида яшовчи яна саккиз нафар автомобиль пойгаси ишқибози қўшилган. Гуруҳ аъзолари автомобилларининг ойналарини қорайтириб, давлат рақам белгиларини ечиб ташлаган ҳолда дрифт ҳаракатларини амалга оширган. Ушбу жараён акс этган видеолар ижтимоий тармоқларда тарқалиб, фойдаланувчиларнинг эътирозларига сабаб бўлган.
Ҳолат юзасидан ўтказилган текширувларда видеоларда кўринган қурол ҳақиқий эмаслиги аниқланган. Автотранспорт воситалари жарима майдончасига жойлаштирилган.
Йиғилган ҳужжатлар ҳуқуқий баҳо бериш учун жиноят ишлари бўйича Навоий шаҳар судига тақдим этилган. Суд мажлисида иштирокчиларнинг кўрсатмалари тингланиб, далилий ашёлар ва видеоёзувлар атрофлича ўрганилган.
Суд мазкур ҳаракатларни жамоат тартибини ва фуқаролар осойишталигини бузувчи, жамиятда юриш-туриш қоидаларини қасддан менсимасликда ифодаланган безорилик деб баҳолади. Натижада ҳуқуқбузарлар Ўзбекистон Республикаси Маъмурий жавобгарлик тўғрисидаги кодексининг 183-моддасида назарда тутилган ҳуқуқбузарликни содир этган деб топилиб, уларга маъмурий қамоқ жазоси тайинланди.
Суд жараёнидан кейин йигитлар қилмишларидан пушаймон эканини билдириб, бошқаларни ҳам бундай ҳаракатлардан тийилишга чақирди.
Улардан бири ижтимоий тармоқларда машҳур бўлиш истаги унинг учун қимматга тушганини, ушбу воқеадан кейин ишидан айрилганини ва автомобили бир неча кундан бери жарима майдончасида турганини айтди.
«Қилган ишимдан афсусдаман. Ҳеч кимга бундай ишни маслаҳат бермайман. Бу видео, айниқса менга қимматга тушди. Халқимдан, ота-онамдан кечирим сўрайман», — деди у.
Ушбу ҳолат ижтимоий тармоқларда эътибор қозониш ва лайк тўплаш мақсадида қонунбузарликка қўл уришнинг оқибати жиддий бўлишини яна бир бор кўрсатди.
Зеро, контент ва обуначилар сони жамоат хавфсизлиги ҳамда қонун талабларидан устун эмас. Қонун устувор, жавобгарлик эса муқаррардир.