Коррупцияга қарши курашиш агентлиги Ахборот хизмати раҳбари Шерзод Сапаров иштирокидаги брифингда давлат ташкилотларида коррупциявий хавф-хатарларни аниқлаш, уларнинг олдини олиш ва ички назорат тизимини кучайтириш борасида амалга оширилаётган ишлар ҳамда муҳим натижалар маълум қилинди.
Хусусан, 2026 йил январь–октябрь ойларида коррупцияга қарши ички назорат бўлинмалари томонидан 5 368 та хизмат текшируви ўтказилди. Уларнинг натижалари бўйича ходимларга нисбатан 594 та жиноий, 160 та маъмурий ва 4 604 та интизомий жазо чоралари қўлланилди. 1 565 та ҳолатда меҳнат шартномалари бекор қилинди. Шунингдек, давлат харидлари соҳасида 57,5 миллиард сўмлик 24 та харидда манфаатлар тўқнашуви, 239,9 миллиард сўмлик 90 та харидда эса аффилланганлик билан боғлиқ қонунбузилишлар аниқланиб, бартараф этилди.
Коррупциявий хавфларни олдиндан аниқлаш борасида ҳам муайян натижаларга эришилди. Жорий йилнинг 10 ойида 18 970 та эҳтимолий манфаатлар тўқнашувининг олди олинди, 1 689 та мавжуд ҳолат бартараф этилди. Қонунчилик талабларини бузиш билан боғлиқ 322 та маъмурий баённома расмийлаштирилди.
Брифингда, шунингдек, бешта вазирлик ва ташкилотда ўтказилаётган ҳуқуқий эксперимент натижалари ҳам тақдим этилди. Жумладан, Соғлиқни сақлаш вазирлиги тизимида давлат харидлари ва тиббий жиҳозлар нархларини қайта кўриб чиқиш орқали 247 миллиард сўм бюджет маблағи тежаб қолинди.
Қурилиш соҳасида электрон тендерлар натижасида қарийб 1,5 триллион сўм иқтисод қилинди. "Ўзбекнефтгаз" АЖда эса рақамли назорат ва видеокузатув тизимларини жорий этиш натижасида 2025 йилда зарар билан ишлаган нефть базалари 2026 йилнинг 9 ойида 44 миллиард сўм соф фойдага эришди.
Брифинг давомида ОАВ вакилларининг комплаенс-назорат ходимларининг мустақиллиги, манфаатлар тўқнашуви, давлат харидлари ва коррупцияга қарши курашиш рейтинглари бўйича саволларига ҳам жавоб берилди.