Марказий банк маълумотига кўра, сентябрь ойида қўмита томонидан рўйхатга олиш ва рухсат бериш йўналишида 21 та масала кўриб чиқилди.
Жумладан, кредит ташкилотлари уставига киритилган ўзгартишларни рўйхатдан ўтказиш бўйича 2 та, микромолия ташкилотларини ҳисоб рўйхатидан ўтказиш, аккредитация ва тўлов ташкилотига лицензия бериш бўйича 7 та масала муҳокама қилинди.
Шунингдек, кредит ташкилотларининг устав фондидаги улушига эгалик қилиш учун рухсат беришга оид 3 та масала кўриб чиқилди. Тижорат банклари кузатув кенгаши ва бошқаруви аъзолари, шунингдек, муҳим аҳамиятга эга ходимлар номзодларини кўриб чиқиш билан боғлиқ 9 та масала ҳам кун тартибидан ўрин олди.
Бундан ташқари, кредит ва тўлов ташкилотларининг молиявий ҳолатига оид 16 та масала кўриб чиқилди. Уларда Марказий банк кўрсатмалари ва пруденциал меъёрлар талабларига риоя этилиши, банклар ҳамда нобанк кредит ташкилотларида ўтказилган инспекция текширувлари натижалари муҳокама қилинди.
Шу билан бирга, молиявий хизматларни «тартибга солиш қумдони» доирасида синовдан ўтказиш масалалари ҳам кўриб чиқилди.
Пруденциал нормативлар ва қонунчилик талабларига риоя этилмагани, шунингдек, инспекция текширувлари давомида аниқланган қоидабузарликлар учун 8 та банкка нисбатан жарима санкциялари қўлланилди.
