Фабио Каннаваро:
"Албатта жаҳон чемпионатидаги илк иштирок осон бўлмаслиги табиий. Қуръа натижалари чиққанидан сўнг Колумбия ва Португалияни кўриб, бизни жуда қийин гуруҳ кутаётганини кутгандик.
Колумбияга қарши ўйиндан кейин ҳам жамоамдан фахрланишимни айтгандим, бугун ҳам жамоам билан фахрланаман. Чунки уларни кўрдим. Ҳа, қийинчиликларга дуч келишди, аммо бир сония ҳам таслим бўлишмади.
Албатта, барча чизиқларда юқори савиядаги футболчиларга эга жамоага қарши ўйнаш доим қийин. Шубҳасиз, улар жуда катта мотивация билан майдонга тушишган эди. Бироқ айтганимдек, бу жаҳон чемпионати биз учун тажриба".
Элдор Шомуродов:
"Биринчи навбатда, бу турнир Ўзбекистон футболи учун жуда катта тажриба бўлмоқда. Биз қанақа ютказган тақдиримизда ҳам, бу нарсадан Ўзбекистон кўп нарса ютди, деб ўйлайман. Шунга қарамай, йирик ҳисобда учралган мағлубият учун мухлислардан узр сўраймиз. Бугунги натижа (Колумбия-Конго учрашуви натижаси)га қараб, 3-турда охирги имкониятимиз бўлади. 3-ўйинда жаҳон чемпионатидаги биринчи ғалабамизни қўлга киритишга ҳаракат қиламиз.
Бизни қўллаб турган барча мухлисларга раҳмат айтамиз. Бунақа мағлубият учун узр сўраймиз. Кейинги ўйинларда қўллаб туришларини сўраймиз".
Аббос Файзуллаев:
"Бугун ҳимояда улгурмаганимиз сабаби – рақиб ҳужумчиларининг даражаси ҳам кучли. Дунёдаги энг кучли яримҳимояга эга жамоага қарши ўйнадик ва бу биз учун катта тажриба бўлди. Ўзбеклигимдан ва шу байроқ остида терма жамоамизни ҳимоя қилаётганимдан жуда ҳам фахрланаман. Ютказган пайтимизда ҳам, ютган пайтимизда ҳам боримизни бериб, бутун терма жамоа Ўзбекистон учун ўйнаймиз".
Беҳруз Каримов:
"Ўйиндан олдин мураббийимиз Криштиану Роналдуни "The Best" деб таърифлади. Рақибнинг ҳар бир ўйинчиси кучли бўлгани учун уларнинг ҳар бирига кўрсатма берилди, лекин айнан Роналдуни ёпамиз, дейилмади. Чунки Роналдуни ёпсак, унинг атрофидаги ўйинчилар ҳам тажрибали".
Равшан Эрматов, (ЎФА биринчи вице-президенти):
"2:0 вақтида голимиз ҳисоблаганда эди... Салгина адолатсиз бўлди. Нима бўлганда ҳам биз ривожланиш босқичидан ўтяпмиз. Ҳурматли президентимиз ҳамма шароит яратиб берган. Озгина вақт керак. 1-синф боласи 9-синф боласи билан рақобатлаша олмайди. Биз 1-синф бўлсак, улар 9-синф. Ўзбекистонда катта салоҳият бор. Йиллар ўтиб Португалиядек жамоалар ҳам Ўзбекистонга қарши қўрқиб тушадиган бўлади.
Бу мусобақа биз қаерда эканимизни, ниманинг устида ишлашимизни кўрсатиб берадиган илк тажриба бўлди".
