Банк маълумотларига кўра, 2026 йилнинг биринчи ярим йиллигида коррупциявий хавф-хатарларни аниқлаш ва бартараф этиш, манфаатлар тўқнашувининг олдини олиш ҳамда очиқлик ва шаффофликни таъминлаш бўйича қатор ишлар амалга оширилган.
Жумладан, банкнинг бош офиси, 15 та ҳудудий банк хизматлари маркази ва 46 та банк хизматлари офисида коррупцияга қарши курашиш чора-тадбирлари дастури ижроси таъминланган.
25 та функцияда коррупциявий хавфлар аниқланган
Банк тизимида коррупциявий хавф-хатарларни баҳолаш натижасида 25 та функцияда бундай хавфлар аниқланган. Банк маълумотига кўра, юқори даражадаги қолдиқ хавфлар ва коррупциявий хатарлар тўлиқ бартараф этилган.
Шунингдек, банк Кузатув кенгаши ва бошқаруви аъзолари, бош офиснинг 26 та департаменти ва мустақил бошқармалари, 15 та банк хизматлари маркази ҳамда 46 та банк хизматлари офисидаги жами 1 361 нафар раҳбар ва ходимнинг манфаатлар тўқнашувига оид декларациялари таҳлил қилинган.
Натижада 40 та манфаатлар тўқнашуви ҳолати аниқланиб, уларни бартараф этиш бўйича тегишли чоралар кўрилган.
ISO 37001:2025 халқаро стандарти бўйича сертификат олинган
«Туронбанк» ташқи аудит натижаларига кўра, коррупцияга қарши бошқарув тизимининг ISO 37001:2025 халқаро стандартига мувофиқлик сертификатига эга бўлган.
Ушбу стандарт коррупциявий хавфларни аниқлаш, баҳолаш ва камайтириш, манфаатлар тўқнашувининг олдини олиш ҳамда коррупцияга қарши самарали бошқарув тизимини шакллантиришга қаратилган.
Бундан ташқари, коррупциявий хавфларга кўпроқ мойил бўлган ходимлар халқаро стандарт талаблари асосида махсус ўқитилган. Банк ходимлари учун мутасадди ташкилотлар билан ҳамкорликда семинар-тренинглар ва давра суҳбатлари ҳам ташкил этилган.
Банк харидларида шаффофликни таъминлаш мақсадида контрагентлар ҳақидаги маълумотларни мониторинг қилиш йўлга қўйилган. Бунда манфаатлар тўқнашуви, банк ходимлари билан аффилланганлик ва харидларнинг бошқа иштирокчилари билан алоқадорлик ҳолатлари ўрганилмоқда.
Коррупция ҳақида хабар бериш каналлари ишламоқда
Банкда коррупциявий хатти-ҳаракатлар ҳақида хабар бериш учун ишонч телефони, Телеграм-бот, электрон почта ва веб-сайт орқали мурожаат қилиш имконияти яратилган.
Ҳисобот даврида ушбу каналлар орқали иккита мурожаат келиб тушган. Улар кўриб чиқилиб, мурожаатчиларга жавоб хатлари юборилган.
Банк маълумотига кўра, коррупцияга қарши курашиш, хавф-хатарларни бартараф этиш, манфаатлар тўқнашувини бошқариш ва ходимларнинг ҳуқуқий билимларини оширишга қаратилган ишлар давом эттирилмоқда.
«Туронбанк» ATБ матбуот хизмати
Реклама
