Сертификатларни топшириш маросимида университет раҳбарияти, профессор-ўқитувчилар, талабалар, бир қатор олий таълим муассасалари ректорлари ҳамда ASIIN халқаро агентлигининг Марказий Осиё бўйича координатори Ирина Ефимова онлайн иштирок этди.
Халқаро аккредитациядан биология, кимё ва физика йўналишларидаги бакалавриат дастурлари, шунингдек, ушбу учта мутахассислик бўйича магистратура дастурлари муваффақиятли ўтди.
Университет ректори Абдуғаффор Қирғизбоев тадбирда таълим сифатини ошириш, халқаро стандартларни жорий этиш ва мутахассислар тайёрлаш тизимини такомиллаштиришга қаратилган ишлар ҳақида маълумот берди. Унинг таъкидлашича, халқаро аккредитация таълим дастурлари сифати, ўқув жараёни самарадорлиги ва мутахассислар тайёрлаш тизимининг халқаро мезонларга мувофиқлигини баҳолашда муҳим аҳамиятга эга.
Тадбирда университетда таълим дастурларини халқаро стандартларга мослаштириш ишлари давом эттирилиши ҳам маълум қилинди. Жумладан, филология ва тилларни ўқитиш йўналишлари бўйича 3 та, иқтисодиёт йўналишлари бўйича эса 5 та таълим дастурини халқаро аккредитациядан ўтказиш режалаштирилган.
Маросим якунида халқаро аккредитациядан ўтган 6 та ва махсус аккредитациядан ўтган 22 та таълим дастурининг сертификатлари тегишли факультет деканлари ҳамда кафедра мудирларига топширилди.
Ушбу натижалар университетнинг таълим сифатини халқаро мезонлар асосида такомиллаштириш ва таълим дастурларининг рақобатбардошлигини оширишга қаратилган ишларининг муҳим босқичи ҳисобланади.
Жасур Лапасов
