Хорижий оммавий ахборот воситалари хабарларига кўра, можаро дастлаб Хуангнинг Megaspeed компаниясининг собиқ раҳбари Элис Хуан билан никоҳдан ташқари муносабатлари ҳақидаги маълумотлар тарқалиши ортидан бошланган. Дастлаб Nvidia ва компания раҳбари улар ўртасида фақат ишбилармонлик алоқалари бўлганини билдирган. Кейинчалик эса Хуанг мазкур муносабатни тан олгани ҳақида хабар берилди.
Шундан сўнг The New York Times нашри Nvidia компаниясида соғлиқни сақлаш йўналиши бўйича вице-президент лавозимида ишловчи Кимберли Пауэлл билан ҳам Хуангнинг яқин муносабатлари бўлгани ҳақида маълумот тарқатди. Қайд этилишича, у бевосита компания раҳбарига бўйсунган.
Мазкур ҳолатлар компанияда корпоратив бошқарув ва манфаатлар тўқнашуви билан боғлиқ саволларни келтириб чиқарган.
Шу билан бирга, АҚШ расмийлари Nvidia технологияларининг Хитойга ноқонуний етказиб берилиши эҳтимоли билан боғлиқ ҳолатларни ҳам текширмоқда. Megaspeed компанияси Nvidia чипларини Хитойга ноқонуний етказиб беришда гумон қилинган, бироқ бу айбловлар рад этилган. Nvidia эса корпоратив маълумотлар сизиб чиққани ёки миллий хавфсизликка таҳдид мавжудлиги ҳақида маълумотга эга эмаслигини билдирган.
Хабарларда айтилишича, Жэнсен Хуанг истеъфога чиққанидан кейин компанияни вақтинча молиявий директор Колетт Кресс бошқаради.
Мазкур воқеалар Nvidia акциялари қийматига ҳам таъсир кўрсатгани хабар қилинди. Жумладан, АҚШ фонд биржалари очилишидан олдин компания акциялари 12,49 фоизга арзонлашиб, 152,04 долларни ташкил этгани айтилган.
