Учрашув давомида томонлар омонатларни кафолатлаш тизими қамровининг
кенгайиши ҳамда аввалги ва амалдаги тизимлар ўртасидаги асосий фарқларни кўриб
чиқдилар. Янги тизимда нафақат жисмоний шахслар, балки тадбиркорлик субъектларининг
омонатлари ҳам кафолатланиши, компенсация тўлашнинг аниқ механизмлари белгилангани ҳамда
омонатчиларга компенсация маблағларидан фойдаланиш имкониятини таъминлаш
муддатлари босқичма-босқич қисқартирилиши қайд этилди.
Учрашувда Омонатларни кафолатлаш жамғармасининг молиявий барқарорлигини
таъминлаш масалаларига алоҳида эътибор қаратилди. Кафолат мажбуриятлари ҳажми
ва уларнинг Жамғарма маблағлари билан қопланиш даражаси, Агентлик активларининг
таркиби, Жамғарма маблағларини шакллантириш манбалари ҳамда зарур ликвидлик
даражасини таъминлаш механизмлари муҳокама қилинди.
Томонлар Жамғарма маблағларини инвестиция қилиш ва бошқариш сиёсатига ҳам батафсил тўхталиб
ўтдилар.
Муҳокамаларнинг яна бир муҳим йўналиши кафолат мажбуриятлари бўйича
хатарларни баҳолаш ва бошқариш тизими бўлди. Агентлик вакиллари омонатларни
кафолатлаш тизимини стресс-тестдан ўтказиш, сценарийли моделлаштириш ҳамда банкларни баҳолашнинг
рискка асосланган механизмларини ривожлантириш бўйича амалга оширилаётган ишлар
ҳақида маълумот бердилар.
Бундан ташқари, томонлар омонатларни кафолатлаш тизими фаолиятининг
шаффофлиги ва ахборотларни ошкор қилиш, Агентликнинг молиявий ҳисоботлари ҳамда
жамоатчиликни мунтазам хабардор қилиб бориш амалиёти юзасидан фикр алмашдилар.
ХВЖ делегациясига Агентликнинг омонатчиларга компенсация тўловларини амалга ошириш бўйича амалий тажрибаси,
жумладан, кафолатлаш ҳодисаси юзага келганда қўлланиладиган ташкилий ва
молиявий механизмлар ҳақида ҳам маълумот берилди.
Учрашув якунида томонлар омонатларни кафолатлаш тизимини институционал жиҳатдан
янада ривожлантириш, унинг молиявий ва операцион барқарорлигини мустаҳкамлаш, хатарларни бошқариш
механизмларини такомиллаштириш ҳамда фаолият шаффофлигини ошириш йўналишларида
ҳамкорликни изчил давом эттириш ва ўзаро тажриба алмашишни кенгайтиришга
келишиб олдилар, деб хабар беради Омонатларни кафолатлаш агентлиги матбуот хизмати.
