Бу ҳақда қуйи палата ахборот хизмати маълум қилди.
Таъкидланишича, қонун лойиҳаси Ўзбекистон Республикаси Конституцияси талабларидан келиб чиққан ҳолда ишлаб чиқилган бўлиб, Президент Администрациясининг давлат бошқаруви тизимидаги ўрни, ҳуқуқий мақоми ва фаолиятининг асосий йўналишларини конституциявий қонун даражасида белгилашга қаратилган.
Лойиҳага мувофиқ, Президент Администрацияси Ўзбекистон Республикаси Президенти томонидан шакллантирилади. Шунингдек, Администрацияга Президент томонидан лавозимга тайинланадиган ва лавозимидан озод этиладиган Администрация раҳбари бошчилик қилади.
Ҳужжатда Администрациянинг мақоми, фаолиятининг асосий принциплари, таркибий тузилмаси, давлат ҳокимияти органлари ва ташкилотлари билан ўзаро ҳамкорлиги, шунингдек, мансабдор шахслар ҳамда ходимлар фаолиятининг кафолатлари аниқ белгилаб берилмоқда.
Бундан ташқари, қонун лойиҳасида Администрациянинг давлат органлари ва ташкилотларининг комплаенс ҳамда коррупцияга қарши ички назорат тузилмалари билан ҳамкорлигига оид нормалар ҳам акс этган.
Лойиҳани тайёрлаш жараёнида АҚШ, Финляндия, Чехия, Словакия, Руминия, Латвия, Тайван, Қозоғистон ва Туркманистон каби давлатлар тажрибаси ўрганилгани қайд этилди.
Муҳокамалар якунлари бўйича қонун лойиҳаси депутатлар томонидан учинчи ўқишда қабул қилиниб, кўриб чиқиш учун Сенатга юборилди.
