Маълум қилинишича, «Хавфсиз ва соғлом юрт» ойлиги доирасида ўтказилаётган профилактик тадбирлар давомида Китоб туманида яшовчи Дилдора Ирисбоева ва унинг онаси Ҳанифа Аннаеванинг қонунга зид ҳаракатлари фош этилди.
Терговга қадар аниқланган маълумотларга кўра, улар қўшни маҳаллада яшовчи Руслан Алимовнинг фермер хўжалигига тегишли ер майдонидан лой ғишт қуйиш мақсадида фойдаланиб келаётганини билган ҳолда, моддий манфаат орттириш мақсадида ўзаро жиноий тил бириктирган.
Шундан сўнг, улар фермерга давлат идораларидаги танишлари орқали ер майдонини кадастр органлари орқали давлат захирасига ўтказиб юборишлари мумкинлигини важ қилиб, босим ўтказган. Шунингдек, Қишлоқ хўжалиги вазирлигига ариза киритилганини айтиб, мазкур масала бўйича даъво қилмаслик ва унинг тадбиркорлик фаолиятига тўсқинлик қилмаслик эвазига 5 миллион сўм талаб қилган.
Қашқадарё вилояти Ички ишлар бошқармаси Тезкор қидирув хизмати ҳамда Уюшган жиноятчиликка қарши курашиш бошқармаси ходимлари томонидан ўтказилган тезкор тадбирда улар товламачилик йўли билан талаб қилинган маблағнинг 3 миллион сўмини олаётган вақтида ашёвий далиллар билан ушланди.
Мазкур ҳолат юзасидан гумонланувчиларга нисбатан Ўзбекистон Республикаси Жиноят кодексининг 165-моддаси иккинчи қисми «в» банди билан жиноят иши қўзғатилган. Айни пайтда уларнинг жиноий фаолияти ва эҳтимолий шерикларини аниқлаш юзасидан тезкор-тергов ҳаракатлари давом этмоқда.
