Рақобат қўмитасининг маълум қилишича, мурожаатларда авиарейсларнинг бир неча соатга кечикиши, йўловчиларга ўз вақтида аниқ ахборот берилмаслиги, хизматлар сифати пастлиги ҳамда кўрсатилмаган хизматлар учун ҳақ олиниши каби ҳолатлар қайд этилган.
Таҳлилларга кўра, айрим ҳолларда ташувчининг айби билан кечиккан рейслар бўйича йўловчиларга компенсация ёки муқобил ечим таклиф этилмаган. Бу эса фуқароларнинг вақти, маблағи ва режаларига жиддий таъсир кўрсатмоқда.
Шу муносабат билан Рақобат қўмитаси маҳаллий авиарейслар ташувчининг айби билан кечиккан ҳолатларда йўловчиларга компенсация тўланиши ҳамда истеъмолчилар ҳуқуқларига риоя этилишини очиқ манбалар асосида ўрганмоқда.
Қўмита авиакомпаниялардан рақамли платформаларидаги ахборотларни тўлиқ тақдим этиш ва уларни қонунчилик талабларига мувофиқлаштиришни сўрамоқда.
Фуқаролар эса ушбу соҳадаги таклиф ва эътирозлари юзасидан Рақобат қўмитасига мурожаат қилишлари мумкин.
