Ҳодиса Иштихон туманидаги «Кўтарма» маҳалласи ҳудудидан оқиб ўтувчи Оқдарё ўзанида содир бўлди. Рейд давомида экскаватор ёрдамида дарё ўзанидан қум-шағал аралашмаси ноқонуний қазиб олиниб, юк автомобилига ортилаётгани аниқланди. Назорат ходимлари қоидабузарликни тўхтатди.
Бироқ юк машинаси ҳайдовчиси қонуний талабга бўйсунмасдан, ходимларга кескин қаршилик кўрсатди. У юк машинасидаги қум-шағальни тўкиб юборди ва экскаватор ҳайдовчисининг ҳодиса жойидан қочишига имкон яратди.
Бундан ташқари, ҳайдовчи юк автомобили билан экологик назорат ходимларидан бирининг машинасига зарар етказди. Қўмита маълумотига кўра, унинг ҳаракатлари ходимлар ҳаётига ҳам хавф туғдирган.
Ҳолат юзасидан тегишли ҳужжатлар расмийлаштирилди. Табиатга етказилган зарар миқдори ҳисобланмоқда. Тўпланган материаллар ҳуқуқий баҳо бериш ва тегишли чоралар кўриш учун ҳуқуқни муҳофаза қилувчи органларга юборилмоқда.
Экология қўмитаси табиий ресурслардан ноқонуний фойдаланиш, дарё ўзанларига зарар етказиш ва назорат тадбирларига тўсқинлик қилиш ҳолатларига нисбатан қонунчиликда белгиланган тартибда чоралар кўрилишини маълум қилди.
