Марказий банкнинг хабарига кўра, субсидия хабарномаси амал қилиш муддати давомида иштирок этувчи тижорат банкида мақсадли ипотека омонати очилади ва фуқаронинг дастлабки бадал учун тўлаши лозим бўлган улуши жамғарилади.

Фуқаронинг улуши тўлиқ шакллангач, дастлабки бадал учун ажратилган давлат субсидияси омонат ҳисобварағига ўтказилади. Шунингдек, омонат маблағларига банк томонидан бозор ставкалари асосида фоиз ҳисобланади.

Мақсадли ипотека омонати 12 ойгача амал қилади. Шу муддат ичида фуқаро бирламчи уй-жой бозоридан хонадон танлаб, ипотека кредитини расмийлаштириши мумкин.

Ипотека кредити ажратилганда омонат маблағлари, уларга ҳисобланган фоизлар, давлат субсидияси ҳамда кредит маблағлари уй-жой харидига йўналтирилади. Агар кредит ажратиш рад этилса, фуқаронинг омонат маблағлари фоизлари билан бирга қайтарилади, субсидия маблағлари эса белгиланган тартибда Давлат бюджетига қайтарилади.

2026 йил 1 август ҳолатига кўра, республика бўйича фуқаролар мурожаатлари асосида 338 та мақсадли ипотека омонати очилган. Уларда жами 23,9 млрд сўм маблағ жамғарилган бўлиб, шундан 13,8 млрд сўми фуқароларнинг шахсий маблағлари, 10,1 млрд сўми эса дастлабки бадални шакллантириш учун ажратилган давлат субсидияси ҳиссасига тўғри келади.