Компания бу технология келажакда дронт, гигант моа каби йўқолиб кетган қуш турларини қайта тиклаш йўлида муҳим қадам бўлишини таъкидламоқда.
Маълум қилинишича, олимлар махсус силикон мембранага асосланган сунъий тухум тизимини ишлаб чиққан. У кислородни ўтказиш, намликни сақлаш ва эмбрионни ташқи таъсирлардан ҳимоя қилиш хусусиятлари бўйича табиий тухум қобиғига яқинлаштирилган.
Компания 26 та соғлом жўжа ана шу сунъий тизим орқали очирилганини билдирди. Янги технология олимларга эмбрион ривожланишини махсус шаффоф ойна орқали кузатиш имконини ҳам беради.
Мутахассислар фикрича, бу биотехнология соҳасида муҳим ютуқ бўлиши мумкин. Бироқ айрим олимлар ҳозирча тадқиқот натижалари мустақил илмий баҳолашдан ўтмагани ва технологиянинг тўлиқ имкониятлари исботланмаганини таъкидламоқда.
Экспертларга кўра, қушларни қайта тиклаш сутэмизувчиларга нисбатан анча мураккаб жараён ҳисобланади. Чунки қуш эмбриони тухум ичида жуда тез ривожланади ва генетик ўзгартириш киритиш имконияти чекланган.
Шу билан бирга, олимлар ушбу технология келажакда йўқолиб кетиш хавфи остидаги қуш турларини сақлаб қолиш, уларнинг касалликларга чидамлилигини ошириш ва иқлим ўзгаришига мослаштиришда қўл келиши мумкинлигини айтмоқда.
