Мажлисда сув хўжалиги тизимида коррупциянинг олдини олиш, давлат маблағларидан самарали фойдаланиш, рақамлаштиришни жадаллаштириш, манфаатлар тўқнашувини бартараф этиш ҳамда соҳада очиқлик ва шаффофликни таъминлаш масалалари танқидий муҳокама қилинди.
Таъкидланганидек, Коррупцияга қарши курашиш миллий кенгаши томонидан коррупцияга қарши курашиш ишларининг ҳолати ҳудудлар ва соҳалар кесимида мунтазам ўрганиб келинмоқда. Шу кунга қадар Қорақалпоғистон Республикаси, Фарғона, Бухоро, Жиззах, Навоий, Сирдарё, Наманган, Сурхондарё, Хоразм ва Самарқанд вилоятлари, шунингдек, Мактабгача ва мактаб таълими ҳамда Соғлиқни сақлаш вазирликларида сайёр муҳокамалар ўтказилган.
Йиғилишда қайд этилишича, 2024–2025 йиллар ҳамда жорий йилнинг ўтган даврида сув хўжалиги тизимида 301 нафар ходим томонидан 243 та коррупциявий жиноят содир этилган. Бунинг оқибатида давлат ва жамият манфаатларига 70 миллиард сўмдан ортиқ зарар етказилган.
Муҳокамалар давомида бюджет маблағларини талон-торож қилиш, сув тежовчи технологиялар учун ажратилган субсидиялардан ноқонуний фойдаланиш, сув фонди ерларини бошқаришдаги қонунбузарликлар, рақамлаштириш ишларининг сустлиги ҳамда манфаатлар тўқнашуви билан боғлиқ ҳолатларга алоҳида эътибор қаратилди. Шунингдек, ўрнатилган «Ақлли сув» қурилмаларининг катта қисми ҳозиргача тўлиқ самарали ишламаётгани танқид қилинди.
Мажлисда коррупцияга қарши курашишда асосий эътибор алоҳида ҳуқуқбузарликларга эмас, балки уларни келтириб чиқараётган сабаб ва шарт-шароитларни бартараф этишга қаратилиши лозимлиги таъкидланди.
Йиғилиш якунида Сув хўжалиги вазирлиги ҳамда Коррупцияга қарши курашиш агентлигига 10 кун муддатда соҳадаги коррупциявий хавф-хатарларни бартараф этишга қаратилган «йўл харитаси»ни ишлаб чиқиб, Миллий кенгашга киритиш вазифаси юклатилди.
