Ҳукуматнинг 2026 йил 3 ноябрдаги 606-сон қарори билан «Техноген хусусиятли фавқулодда вазиятлар оқибатида аҳолига етказилган зарарни баҳолаш ва қоплаш тартиби тўғрисида»ги низом тасдиқланди.
Низомга кўра, техноген хусусиятли фавқулодда вазиятларга транспорт авариялари ва ҳалокатлари, кимёвий хавфли ҳамда ёнғин-портлаш хавфи мавжуд объектлардаги ҳодисалар, энергетика ва коммунал тизимлардаги авариялар, шунингдек, бино конструкцияларининг тўсатдан бузилиши каби ҳолатлар киради.
Қарорда фавқулодда вазият оқибатида ҳалок бўлган фуқароларнинг оила аъзолари учун ҳар бир оила аъзосига тенг улушда БҲМнинг 500 бараваригача миқдорда бир марталик моддий ёрдам тўлаш белгиланган.
Тан жароҳати олган фуқароларга эса жароҳат оғирлигига қараб қуйидаги миқдорда ёрдам берилади:
- оғир тан жароҳати олганларга — БҲМнинг 200 бараваригача;
- ўртача оғирликдаги жароҳат олганларга — БҲМнинг 150 бараваригача;
- енгил тан жароҳати олганларга — БҲМнинг 100 бараваригача.
Жабрланган шахслар фавқулодда вазият содир бўлган кундан бошлаб 30 кун ичида белгиланган шаклдаги аризани тўлдириб, тегишли комиссияга тақдим этиши лозим.
Моддий ёрдам Қорақалпоғистон Республикаси Вазирлар Кенгаши Раиси, вилоятлар ва Тошкент шаҳри ҳокимларининг қарорлари асосида тўланади.
Низомда зарарни қоплашнинг икки ҳолати назарда тутилган. Биринчиси — фавқулодда вазият учун айбдор шахслар суд томонидан аниқлангунига қадар жабрланганларга тўловларни жамғарма маблағлари ҳисобидан амалга ошириш. Иккинчиси — айбдор деб топилган юридик шахс ёки унинг мансабдор шахси зарарни белгиланган муддатда тўлиқ қоплай олмаган ҳолатлар.
Бундай тўловлар тегишли туман ёки шаҳар ҳокимлиги ҳузурида ташкил этиладиган Техноген хусусиятли фавқулодда вазиятлар оқибатида аҳолига етказилган зарарни қоплаш жамғармаси орқали амалга оширилади.
Шу тариқа, янги тартиб техноген авария ва ҳалокатлар оқибатида жабрланган аҳолига моддий ёрдам кўрсатиш ҳамда зарарни қоплаш механизмларини белгилайди.
